Shtypi serb sërish ka nisur të shkruaj mbi mundësinë e njohjes së Kosovës nga Greqia, siç thuhet nga ata, me presionin e perëndimit në shkëmbim të asistencave financiare.
Drejtori i Programit në Fondacionin Helenik për Politika Evropiane dhe të Huaja (ELIAMEP), Janis Armalakos, ka thënë se përderisa Athina thotë se nuk ka ndryshim qëndrimi në raport me Kosovën, mes rreshtash ndjehen ndryshimet e politikave greke ndaj Kosovës, transmeton Indeksonline.
Megjithatë, ai në një intervistë për agjencinë serbe të lajmeve “Tanjug”, ka thënë se vetëm koha do të dëshmoj nëse ndryshimi i Greqisë karshi Kosovës po ndodhë me të vërtetë.
E përditshmja greke “Kathermini” ka shkruar se Athina ka në plan njohjen e Kosovës shtet të pavarur.
Sipas gazetës,kjo mund të ketë shërbyer edhe si shkak për përplasjet e fundit diplomatike mes Greqisë dhe Serbisë.
“Kathimerini” duke cituar burime të politikës së jashtme në Athinë, shkruan për pakënaqësinë greke me lëvizjet ndërkombëtare të Beogradit në lidhje me Kosovën dhe në vazhdën e kontestit të emrit me ish-Republikën Jugosllave të Maqedonisë.
Sipas Tanjug analistët e politikave ndërkombëtare kanë debatuar gjerë dhe gjatë mbi qëndrimin e Greqisë ndaj Kosovës, dhe shumë prej tyre kanë bërë thirrje për rishqyrtimin e mos-njohjes së Kosovës nga ana e Greqsië.
Ata argumentojnë se Serbia e ka humbur betejën me Kosovën, dhe nuk mund ta arsyetohet fakti se pse Greqia është përfshirë në këtë gjë të kotë për një kohë të gjatë, dhe se çështja e Kosovës gabimisht është paralelizuar me çështjen e Qipros.
Në pikëpamjet e tyre, Kosova është një realitet de fakto në regjion, dhe për këtë arsye midis Athinës dhe Prishtinës duhet rinovuar marrëdhëniet për arsye politke, ekonomike dhe sigurie.
Tanjug shkruan se të gjithë njohësit e politikave ndërkombëtare besojnë se njohja e Kosovës në kohë të duhur mund të mundësoj të ndërtimin e urave të bashkëpunimit midis Greqisë Shqipërisë, dhe popullatës shqiptare në regjion.
Armakolas beson se kjo vijë mendimi është ndarë prej kohësh nga Ministri për Punë të Jashtme i Greqisë, i cili në një moment kishte thënë se “ngujimi” mbi vendimin për mos-njohjen e Kosovës, nuk është një pozicion i lakmueshëm për ndërtimin e politikave të reja në regjion.
“Nuk është rastësi që prej pesë vendeve evropiane që nuk e kanë njohur Kosovën, Greqia deri tash ka avancuar më së shumti marrëdhëniet me Prishtinën, duke dhënë shenja për përmirsimin e marrëdhënieve, edhe pse pretendimet nuk janë bërë të ditura botërisht asnjëherë. Përfshirja e Greqisë në marrëdhënie me Kosovën, mund të konsiderohet si një proces që hap pas pahi çon te njohja e Kosovës, apo siç do t’i konvenonte Serbisë në një pozicion mos-njohjeje me bashkëpunim të plotë bilateral (Gjithcka përveç njohjes)”, ka thënë Armakolas.
Edhe pse ambasada greke në Beograd disa herë ka ripërsëritur se qëndrimi i Greqisë mbi Kosovën mbetet i pandryshuar, Armakolas mendon se mes rreshtash ka shenja të qarta të ndryshimit të Greqisë mbi këtë çështje.
