Ministrja Edita Tahiri gjatë raportimit para anëtarëve te Komisionit për Punë të Jashtme ka thënë se dialogu me Serbinë në Bruksel është çështja kryesore e Kosovës. Qeveria e Kosovës sipas saj, është përpjekur që të ruajë interesin nacional të Kosovës.
“Ne i kemi ruajtur vijat e kuqe në dialogun me Serbinë”, ka thënë Tahiri.
Ajo ka thënë se dialogu ka pasur disa rezultate në disa fusha. Ka mundësuar forcimin e sovranitetit të Kosovës.
“Me marrëveshjen e IMB-së Kosova ka arritur të rrumbullakësojë vendosjen e pikave kufitare në veri. Është bërë shuarja e strukturave serbe dhe ish-pjesëtarët e këtyre institucioneve janë pjesë e Policisë së Kosovës. Fusha tjetër është marrëveshja me normalizim”, tha Tahiri.
Ajo ka thënë se Serbia nuk do të mund të anëtarësohet në BE pa pranimin e shtetit të Kosovës. Sipas Tahirit qe një vit Serbia është penguar në vazhdimin e rrugës drejt anëtarësimit në BE për shkak të mos respektimit të marrëveshjeve me Kosovën.
Tahiri ka thënë se kohëve te fundit është vërejtur një përkrahje e shtetit serb ndaj strukturave ilegale në veri dhe për këtë çështje sipas ministres Tahiri është njoftuar edhe Brukseli.
Ministrja për dialog Edita Tahiri ka thënë se është përpiluar një draftligj i cili parasheh implementimin e marrëveshjes për drejtësi. Duke folur për heqjen e barrikadës mbi lumin Ibër, ajo beson se kjo barrikadë do të largohet shumë shpejt.
Ajo tha se ka marr mesazhe nga Brukseli se brenda tre muajve do të hiqet barrikada në urën e Ibrit, por se nuk e dinë nëse do të ndodh sigurt kjo.
Ministrja Tahiri ka theksuar se nuk do të këtë themelim të Asociacionit të Komunave serbe pa implementimin e të gjitha marrëveshjeve siç është shuarja e strukturave paralele, heqja e barrikadës etj. Sipas saj, asociacioni do të punojë bazuar në ligjet e Kosovës.
Tahiri njoftoi se temat e ardhshme në dialog me Serbinë: do të jenë demarkacioni i kufirit, respektimi i sovranitetit nga të dyja shtetet, mos ndërhyrja në punë të njëra-tjetrës, njohja e ndërsjelltë e shteteve, vendosja e bashkëpunimit ndërshtetëror në mes të dy shteteve, pamundësimi që Serbia të bëhet pjesë e BE-së pa njohjen e Kosovës, etj. /KP/
