Afati për pranimin e studentëve në konvikte në vitin e ri akademik ka përfunduar, ndërsa sot nis procesi i vlerësimit të aplikacioneve, rezultatet e të cilave pritet të shpallen më 25 shtator.
Siç bëhet e ditur, 7420 studentë kanë aplikuar për kapacitetin prej 3600 vendeve sa ka Qendra e Studentëve aktualisht.
“Nga data 15 fillon vlerësimi i të gjitha aplikacioneve ndërsa rezultatet shpallen më 25 shtator”, tha për KALLXO.com drejtori i Qendrës së Studentëve, Fatmir Sfishta.
Për të fituar të drejtën e banimit në konvikt dhe shfrytëzimin e mensës, studentët duhet t’i plotësojnë tri kritere bazë.
“Duhet të jetë student i rregullt i Universitetit të Prishtinës, të jetë në largësi 25 kilometra e më shumë nga kryeqyteti si dhe nota mesatare të jetë sa më e lartë”, tha Sfishta.
Të gjithë ata që mund të jenë të pakënaqur me rezultatet, do t’i kenë tri ditë të drejtë ankese, pas shpallës së rezultateve.
Ndërsa për vitin e ardhshëm, Qendra e Studentëve pritet ta rrisë kapacitetin për 300 studentë pasi që së shpejti pritet fillimi i ndërtimit të një konvikti të ri.
“Javën e ardhshme do të bëhet inaugurimi i nisjes së punimeve për konviktin numër 8”, tha Sfishta.
Për të banuar dhe ushqyer në qendër një student duhet të paguajë 35 euro. Për banim, çmimi do të jetë 20 euro, ndërsa për mensë duhet paguar 15 euro.
Konkursi për pranimin e studentëve në konvikte për vitin akademik 2015/2016 ishte i hapur nga 3 shtatori deri më 11 shtator.
Mbarëvajtja e procesit të përzgjedhjes së studentëve në qendër do të monitorohet nga Internews Kosova (I/KS), përmes platformës KALLXO.com, pas një memorandumi marrëveshjeje të nënshkruar më 1 shtator mes Qendrës e Studentëve (QS) të Universitetit të Prishtinës dhe Internews Kosova.
Marrëveshja është bërë me qëllim të përkrahjes së proceseve të përmirësimit të transparencës së konkursit për akomodim dhe shfrytëzim të shërbimeve të mensës në Qendrën e Studentëve të këtij universiteti
