Ka kaluar saktësisht një vit që kur një pjesë e profesorëve të angazhuar në Universitetin e Prishtinës “Hasan Prishtina” nuk e kanë marrë asnjë cent. Bëhet fjalë për mësimdhënësit e angazhuar në programin për Avancimin dhe Kualifikimin e Mësimdhënësve.
Kështu i kanë thënë Gazetës Blic burime brenda Rektoratit. Sipas këtyre burimeve, menaxhmenti i UP-së nuk është marrë fare me këtë pjesë të stafit.
Lajmin e ka konfirmuar edhe një mësimdhënës i angazhuar në Programin AKM.
“Pavarësisht pse janë përfunduar të dy semestrat e kaluar, dhe ka filluar viti i ri akademik, nuk e kemi marrë as edhe një cent”, ka thënë ky mësimdhënës për Gazetën Blic.
Ndryshe, sipas këtij mësimdhënësi, nuk është hera e parë që UP vonohet me pagesat ndaj profesorëve të angazhuar, e sidomos ndaj atyre të angazhuar në AKM.
