Jo vetëm punonjësit e Policisë së Shtetit, por të gjitha institucionet qendrore, përfshi ministri e drejtori të ndryshme do t’i furnizojnë automjetet e tyre me karburant vetëm përmes kartës elektronike. Qeveria e ka marrë këtë vendim në një nga mbledhjet e saj të fundit, më 29 korrik.
“Në mbështetje të nenit 100 të Kushtetutës dhe të nenit 16, të ligjit nr. 9936, datë 26.6.2008, ‘Për menaxhimin e sistemit buxhetor në Republikën e Shqipërisë’, të ndryshuar, me propozimin e ministrit të Financave, Këshilli i Ministrave vendosi: Njësitë e qeverisjes së përgjithshme sigurojnë që shërbimi i furnizimit me karburant për mjetet efektive të transportit të kryhet vetëm nëpërmjet kartës elektronike me të cilën mundësohen identifikimi i mjetit dhe përdoruesi i saj”, thuhet në vendim.
Pak ditë më parë, kryeministri Rama dhe ministri i Punëve të Brendshme Saimir Tahiri prezantuan praktikën e re që u aplikua së pari në Policinë e Shtetit.
