Kryetari i Aleancës Kosovare për Biznese, Agim Shahini, ka kritikuar vendimin e Administratës Tatimore të Kosovës (ATK) për ndalimin e pagesave me para të gatshme mbi 2 mijë euro, duke vlerësuar se masa do të rëndojë konsumatorët, diasporën dhe bizneset.
Shahini, në një intervistë për Ekonomia Online, tha se ATK-ja është “ngutur” me marrjen e këtij vendimi dhe se përfituesit kryesorë do të jenë bankat.
Ai tha se vendimi prek edhe qytetarët e diasporës që nuk kanë shtetësi të Kosovës dhe për pasojë nuk mund të hapin llogari bankare në vend.
“Në Kosovë është marrë një vendim i tillë që mendoj që këtu do ta godet fort blerësin, sepse në këtë rast ATK është dashur që ta kontrollojë shitësin në forma që i ka mekanizmat për ta ruajtur informalitetin, por blerësi, ta marrim shembull diasporën tonë, qytetarët tanë, fshatarët tanë, vijnë ose do të ndërtojnë një shtëpi dhe ata për me ndërtu atë shtëpi, sado që e vogël, kushton me mijëra, dhjetëra mijëra euro dhe shkojnë në një vend për të blerë materialin ndërtimor dhe ajo kushton më shumë se 7-8 mijë euro, 10 mijë euro, 15 mijë euro, varësisht. Ai e blen herë pas here dhe qytetarët tanë detyrohen të hapin një llogari bankare, ta mirëmbajnë atë llogari, ajo është e shtrenjtë, kurse në vendet e BE-së mund të shkosh të blesh deri në 10.000 euro çka të duash, kur të duash dhe nuk të pyet askush çka po blen dhe kjo mendoj që nuk është menduar mirë, mendoj që do të goditen konsumatorët. Kurse informaliteti ka mekanizma ndryshe që mund të luftohet, sepse secili qytetar, biznes, duhet ta ngritin kulturën e vet fiskale, të paguajnë tatim, të paguajnë taksat, por mos të kufizohet sistemi i pagesës, sikur në këtë rast deri në 2.000 euro”.
“Mendoj që Kosova në këtë rast nuk ka menduar mirë për qytetarët, nuk ka menduar mirë për njerëzit e diasporës, për konsumatorin. Ata të diasporës, nëse kanë pasaportë të huaj dhe jetojnë në Kosovë, nuk kanë nënshtetësi të Kosovës, ata nuk mund ta hapin as llogarinë në Kosovë dhe kjo është goxha e rëndë dhe mendoj se ATK është ngutur që të marrë një vendim të tillë dhe një vendim i tillë nuk besoj që do t’i sjellë përfitim më shumë shtetit, përpos bankave që edhe ashtu i kanë krejt shërbimet të shtrenjta, interesin e kanë të shtrenjtë dhe nuk janë aq në bashkëpunim me konsumatorin dhe kjo mendoj që e ka goditur tepër konsumatorin”, tha ai.
Sipas tij, kufizimi i pagesave “cash” nuk do të ndikojë domosdoshmërisht në luftimin e informalitetit, ndërsa shtoi se vendet e Bashkimit Evropian nuk kanë kufizime të tilla.
Shahini shtoi se problemi kryesor mbetet mos-lëshimi i faturave fiskale nga shitësit.
“Informaliteti në këtë formë nuk mund të themi se do të sigurohet më shumë, por detyrimi në sistemin bankar është një kontroll më i madh, por në anën tjetër është një kufizim më i madh që vendet tjera nuk e kanë, nuk e ka as BE-ja, sepse secili prej neve mund të blejmë në BE deri në 10.000 euro çka të duam, pa kufizim, pa u futur përmes sistemit bankar, por janë mekanizmat tjerë që shitësi nuk guxon me të shitur pa faturë asgjë, kurse tek ne kjo ende vazhdon të shesin pa fatura. Informaliteti ekziston, sidomos në shërbime, sidomos në sektorin e ndërtimtarisë, të zejtarive të ndryshme, e që ATK do duhej të rrisë kontrollin më shumë përmes arkave fiskale dhe arkat fiskale janë ato që e kontrollojnë, por sistemi bankar nuk është ai që e kontrollon biznesin, a po e shet dhe a po e paguan taksën e tatimit, por është ATK përmes sistemit të arkave fiskale”, tha ai.
Administrata Tatimore e Kosovës ka njoftuar se nga 1 qershori 2026, pagesat mbi 2 mijë euro ndërmjet bizneseve dhe individëve nuk do të lejohen të kryhen me para të gatshme, por vetëm përmes sistemit bankar ose formave elektronike të pagesës.
“Nga 1 qershori 2026, pagesat mbi 2,000€ ndërmjet bizneseve dhe individëve nuk lejohen të kryhen me para gatshme dhe duhet të realizohen vetëm përmes sistemit bankar ose formave të tjera elektronike të pagesës. Respektoni kufizimin e përcaktuar me ligj dhe shmangni gjobat. Mos paguani cash mbi limitin e lejuar”, thuhet në njoftimin e ATK-së.
