Profesori amerikan, Daniel Serwer ka vlerësuar se fitorja e Listës Studentore në Serbi mund të shënojë një pikë kthese për demokracinë në Ballkanin Perëndimor, por ka theksuar se drejtimi ndërkombëtar i udhëheqjes së re mbetet i paqartë.
Në një intervistë për lajmi.net, Serwer ka thënë se lëvizja studentore mund të përballet me pengesa të mëdha në përpjekjet për ta ndryshuar kulturën politike në Serbi, duke përmendur kundërshtimet e mundshme nga institucionet shtetërore, parlamenti, Rusia dhe Kina.
Duke folur për marrëdhëniet me Kosovën, ai ka theksuar se Beogradi duhet të tregojë fleksibilitet nëse dëshiron t’i përmirësojë raportet me Bashkimin Evropian.
Serwer këshillon Listën Studentore për raportet me Kosovën: Nëse doni përmirësim të marrëdhënieve me BE-në, zbatoni dhe nënshkruani marrëveshjet ekzistuese
“Ka pak bazë mbi të cilën mund t’i përgjigjemi kësaj pyetjeje. Studentët në maj përsëritën pretendimin e Kushtetutës së Serbisë për sovranitet mbi Kosovën, por nëse Beogradi dëshiron t’i përmirësojë marrëdhëniet me BE-në, do të jetë i nevojshëm një fleksibilitet i caktuar për Kosovën. Do të sugjeroja që qeveria e re t’i zbatojë dhe t’i nënshkruajë marrëveshjet ekzistuese”, ka theksuar ai.
Ai ka kërkuar gjithashtu që SHBA-ja dhe BE-ja të insistojnë në reforma demokratike, liri më të madhe të mediave dhe bashkëpunim rajonal, duke theksuar nevojën për bashkëpunim me Kosovën dhe respektimin e integritetit të saj territorial.
Serwer ka kritikuar edhe mbështetjen e Beogradit për Listën Serbe, duke thënë se kjo duhet të përfundojë.
Duke vlerësuar rëndësinë më të gjerë të zhvillimeve politike në Serbi, Serwer ka thënë se fitorja e Listës Studentore mund të shënojë një pikë kthese për demokracinë në Ballkanin Perëndimor.
Sipas tij, ky rezultat tregon se modeli i stabilokracisë, në të cilin stabiliteti politik përdoret si argument për tolerimin e mangësive demokratike, është një politikë e dështuar.
“Unë mendoj se fitorja e Listës Studentore është një tregues i qartë se stabilokracia është një politikë e falimentuar dhe se demokracia e vërtetë mund të mbijetojë në Ballkan. Nuk shoh se si Lista Studentore mund të mos shkëputet nga politikat e qeverisë së mëparshme në planin e brendshëm, por drejtimi i saj ndërkombëtar ende nuk është i qartë”, ka thënë ai.
Daniel Serwer është profesor dhe studiues i lartë në Institutin e Politikës së Jashtme në Shkollën e Studimeve të Avancuara Ndërkombëtare të Universitetit Johns Hopkins në Shtetet e Bashkuara.
