Në seanca gjyqësore gjithçka mund të dëgjohet. Akuza të rënda për vepra nga më të ndryshmet.
Por, në një seancë në Gjykatën Themelore në Prizren më së shumti u dëgjuan fyerje e sharje mes dy palëve.
Një praktikante me emrin Emira Gavazaj është përplasur rëndë me avokaten Myrvete Qollaku që po përfaqësonte njërën nga palët në këtë seancë. Siç shihet në këtë incizim të fshehtë, sjellja e avokates Qollaku tejkalon çdo normë etike e profesionale, përderisa ajo gjendet brenda sallës në Gjykatë, raporton KTV.
Emira Gavazaj beson se reagimi i avokates Qollaku kishte të bënte me një shkrim të saj të botuar në medie, në të cilin ajo përmendte burrin e saj, i cili ushtron funksionin e gjyqtarit.
Gavazaj ka ngritur kallëzim penal ndaj avokates Qollaku për fyerje dhe dëmtim të personalitetit të saj, transmeton Koha.net.
Gavazaj ka një kohë të gjatë që është duke kërkuar drejtësi për babanë e saj, i vrarë para më shumë se dy vjetësh në pikën kufitare në Vermicë nga një pjesëtar i Policisë së Kosovës, i dënuar për vrasje.
