Deputeti i Lidhjes Demokratike të Kosovës (LDK), Adem Salihaj, në emisionin “Info- Box”të RTV Dukagjini, ka theksuar se presidenti i zgjedhur Hashim Thaçi do të akuzohet nga Gjykata Speciale, ndërsa sipas tij, Thaçi ka dërguar shumë shokë të luftës në burg.
Sipas tij, është e palogjikshme që Thaçi të mos akuzohet, sepse secili raport ndërkombëtar, në të cilin flitet për krimet e kryera gjatë dhe pas luftës, sipas tij, e apostrofon ish – shefin e PDK-së si përgjegjësin kryesor.
“Nuk besojë se atë do të mund ta shpëtojë ndonjë lloj imuniteti, madje as pozita e presidentit. Unë mendoj që ai do të jetë në listën e të akuzuarve. Thaçi është akuzuar publikisht në raportin e Dick Martyt”.
Salihaj më tutje ka theksuar se Thaçi dallohet si njeri dhe politikan i zhdërvjellët, madje sipas tij, ai i ka dërguar shumë shokë të luftës në burg.
“Ai ndoshta prapë do të tregohet i zhdërvjelltë dhe mund t’i dërgoj edhe shokët tjerë në burg”, ka shtuar ai. /Telegrafi/
