Deputeti i LDK-së në Kuvendin e Kosovës, Adem Salihaj, i ftuar në “Interaktiv” të KTV-së, ka thënë se të dy marrëveshjet e arritura në Bruksel mes Kosovës e Serbisë dhe Kosovës e Malit të Zi, duhen rishikuar.
“Te Asociacioni i Komunave me shumicë serbe kishte shumë elemente që të krijohej njëfarë autonomie për të. Kanë autonomi në arsim, shëndetësi, planifikim hapësinor, punësim, polici, prokurori, gjyqësi… Këtë e pohoi edhe presidenti i Serbisë se është projekt i tyre. Për këtë arsye kam thënë se duhet rishikuar”, ka thënë Salihaj.
Ai ka përshëndetur vendimin e presidentes për dërgim të marrëveshjes për Asociacionin në Kushtetuese, gjykatë e cila e anuloi atë.
Edhe për marrëveshjen për demarkacion me Malin e Zi, ka thënë se duhet rishikuar dhe duhet formuar një grup me ekspertë nga Kosova e jo nga ndërkombëtarët.
“Duhet të krijohet një grup ekspertësh nga Kosova, e jo ndërkombëtar. Nuk më pëlqen që ndërkombëtarët t’i kenë në dorë çështje kaq të rëndësishme të Kosovës”, ka thënë Salihaj.
Sa i përket protestave të opozitës, deputeti i LDK-së tha se me këto protesta të dhunshme nuk mund të arrijnë asgjë, porse ka metoda tjera për të arritur qëllimet e tyre.
