Rënia e pandërprerë e shiut dhe rritja e nivelit të ujit ka bllokuar dy rrugë në Malishevë, më saktësishtë ata Malishevë- Duhël dhe Mirushë-Gurbardh.
Reshjet e shiut kanë bërë që të rritet niveli i ujit në lumin Mirusha, por edhe në përroska.
Tek liqeni në Mirushë, uji ka mbuluar urën dhe si pasojë është bërë e pakalueshme rruga për në fshatin Gurbardh.
Sipas të dhënave nga drejtoria për Mbrojtje dhe Shpëtim, uji ka depërtuar në shkollën e fshatit Burim, ku është dashur të intervenojnë ekipet e zjarrfikësve dhe shpëtimit, ndërsa mësimi është ndërprerë në atë shkollë, transmeton Klan Kosova.
Në një komunikatë dërguar nga komuna e Malishevës thuhet se uji ka depërtuar edhe në disa shtëpi banimi në qytetin e Malishevës, kryesisht në bodrume.
Sipas tyre, gjendja aktuale është nën kontroll, por kanë lutur qytetarët që të mos lëvizin pa nevojë, pasi sasia e ujit në lum dhe përroska, është ende e madhe.
Sipas drejtorit të Drejtorisë për Mbrojtje dhe Shpëtim, Sejdi Paçarizi, ekipet emergjente janë në gatishmëri të plotë deri në qetësimin e situatës.
