Anulimi i protestës së partive opozitare, e paralajmëruar për datën 26 mars, qysh një muaj më parë, veç qytetarëve, ka befasuar dhe eksponentë të rëndësishëm të këtyre partive.
Paqartësia rreth mbajtjes apo jo të kësaj proteste u rrit, pasi partitë opozitare anuluan konferencën për medie, dhe liderët e tyre u takuan për të diskutuar, njofton Klan Kosova
Disa orë para këtyre zhvillimeve, deputeti i Lëvizjes Vetëvendosje, Rexhep Selimi, shpërndau, në llogarinë e tij në Facebook, thirrjen për protestë.
Nga këto zhvillimet lihet të kuptohet që askush nuk e kishte të qartë se çfarë do të ndodhte, dhe vendimi është marrë aty për aty, në takimin e liderëve në mesditë.
Pas takimit kryetari i Lëvizjes Vetëvendosje – shefi partiak i Selimit – Visar Ymeri, nuk ka pranuar të deklarohet për medie.
Por ishin dy liderët e partive opozitare ata që siguruan se kundërshtimi opozitar nuk do të ndalet, dhe protesta do të mbahet një ditë tjetër.
Llideri i Aleancës për Ardhmërinë e Kosovës, Ramush Haradinaj tha se ishin partnerët politik opozitarë ata që kërkuan që protesta e nesërme të shtyhet për një moment më të përshtatshëm.
Ndërsa Fatmir Limaj, lider i NISMA deklaroi se opozita do të vazhdojë të qëndrojë e bashkuar, ndërsa protesta do të mbahet një ditë tjetër.
