Pas vendimit të Gjykatës Kushtetuese, e cila e refuzoi kërkesën e opozitës që ta shpallë si antikushtetuese riprocedimin në Kuvend të amendamentit kushtetues, që i hapi rrugë themelimit të Gjykatës Speciale, ka reaguar sekretari i Përgjithshëm i Nismës për Kosovën, Bilall Sherifi.
Ai në një prononcim për Gazetën Blic ka thënë se “fakti që, të gjitha rastet të cilat opozita i dërgon në Kushtetuese shpallen të pa pranueshme, dëshmon se Gjykata Kushtetuese është bërë pjesë e legjitimimit të vendimeve të dëmshme për vendin”.
“Duke qenë të vetëdijshëm se po ta shpallnin kërkesën e opozitës të pranueshme, nuk do të mund t’i rrëzonin argumentet e saj, ajo ka zgjedhë rrugën e shpalljes së kërkesave si të papranueshme”, ka thënë ai për Gazetën Blic.
Sipas tij, kjo është edhe një dëshmi më shumë se Gjykata Kushtetuese deri më tani nuk ka qenë gardian i kushtetutës por gardian i qeverive dhe vendimeve të tyre.
“Ky institucion i rëndësishëm për sistemin tonë juridik dhe kushtetues ka kohë që ka pushuar ti kryej detyrimet e tij kushtetuese. Duke i pasur parasysh këto që thash, fatkeqësisht edhe ky vendim i Gjykatës Kushtetuese del të mos jetë i papritur”, ka thënë ai./ Gazeta Blic
