Policia e Mitrovicës ka zbuluar një rast mashtrimi ku një person para katër ditësh kishte raportuar se persona të panjohur ia kanë plaçkitur paratë por që ka rezultuar se ai kishte inskenuar rastin ndërsa para i kishte humbur në lojërat e fatit.
Në një komunikatë lëshuar nga Drejtoria Rajonale në Mitrovicë thuhet se katër ditë më parë kishin nisur hetimet për rastin ‘grabitje’ të raportuar nga viktima/tashmë i dyshuari i cili kishte deklaruar se në orët e mbrëmjes së datës 16 janar 2016, derisa po udhëtonte me veturë si shitës ambulant për një kompani mallrash, nëpërmes rrugës rajonale Vushtrri- Skenderaj me të arritur në fshatin Dubovc, kishte raportuar se dy persona të maskuar nën kërcënimin e armës ia kishin marrë një shumë të hollash në vlerë 500 euro, të holla këto që i posedonte nga shitja e mallrave ambulantë.
Pas procedimit me vendin e ngjarjes me autorizim të prokurorit hetuesit kishin nisur hetimet drejt zbardhjes së rastit, të cilët gjatë hetimeve të vazhdueshme për rastin, si dhe mbi bazën e deklarimit të viktimës për rrethanat e rastit të raportuar si ‘grabitje’ kanë arritur që të zbulojnë se nuk ekziston asnjë provë që në kohën e raportimit të veprës të ketë ndodhur ‘grabitja’.
Kjo ka rezultuar që viktima/tashmë i dyshuari L. P. 35 vjeçar, të ketë deklaruar rrejshëm duke inskenuar rastin mbi justifikimin e shumës së të hollave tek pronari i kompanisë, të cilat i kishte humbur në lojëra fati disa orë para kohës së raportuar për grabitje.
Rrjedha hetimore si dhe provat e siguruara kanë bërë që vepra penale të tjetërsohet nga rasti ‘grabitje’ në vepër penale ‘deklarim i rrejshëm’ ndaj ankuesit tashmë në cilësi të të dyshuarit, i cili pas intervistës është liruar për procedurë të rregullt.
