AAK’ja e Ramush Haradinajt nga kjo e shtunë nis edhe zyrtarisht procesin e brendshëm zgjedhor
Kreu i kësaj partie, fundvitin e kaluar, kur bëri publike se AAK’ja do të mbajë zgjedhje brenda saj, kishte paralajmëruar se ky proces po niset për t’u pastruar partia e tij nga disa individë që kanë lidhje me krimin dhe haraqin e që i kanë sjellë dëme në elektorat këtij subjekti politik.
E tash kur po nis procesin zgjedhor, AAK’ja po thërret për mobilizim dhe po paralajmëron fundin e një qeverisje të izolimit, duke synuar edhe masivizimin e këtij subjekti gjatë procesit që ata po e quajnë zgjedhje edhe për Kosovën.
Te masivizimi dhe prurjet e reja në këtë subjekt, deri me tani nuk është vërejtur diçka e tillë. Madje, muajt e fundit nga ky subjekt ka pasur ikje të dy deputetëve. Blerim Shala çeli rrugë, e hapave të tij shkoi Milehate Tërmkolli. E, nëse do të ketë prurje apo rritje në AAK mbetet të shihet në ditët në vijim për ta mësuar, apo mbase diçka do të mësojmë nga e shtuna kur nis ky proces.
Por, ajo që mbetet ‘enigmë’ është se për çka po mobilizohet Ramushi dhe njerëzit e tij dhe për çfarë ‘zgjedhjesh për Kosovën’ po flasin ata.
Ftesa e AAK’së:
Po masivizohet Aleanca.
Po mobilizohet Ndryshimi.
Po përfundon Qeverisja e Izolimit.
Më 21 mars 2015 – e shtunë – hapet procesi i zgjedhjeve në Aleancë.
Nuk janë vetëm zgjedhje të brendshme, por janë zgjidhje për Kosovën.
ALTERNATIVA ndaj pushtetit po forcohet.
Ndershmëri
Përkushtim
Përgjegjësi.
