“Ne duam të rrisim bashkëpunimin me Serbinë dhe së bashku të arrijmë progres në rrugën drejt paqes dhe integrimit në BE”, shprehet kryeministri, Edi Rama në prag të vizitës së Aleksandër Vuçiçit në Tiranë.
Duke folur për AFP-në, Rama nënvizon se kjo është vizita e parë e një kryeministri serb në Shqipëri. Vuçiç do të jetë të mërkurën në Tiranë, ku pas ceremonisë zyrtare, do të ketë një pritje gala në Pallatin e Brigadave.
Rama dhe Vuçiç do të kenë një takim kokë më kokë, ku pas kësaj do të takohen dhe dy delegacionet dhe më pas dy kryeministrat do të dalin në konferencë për shtyp.
Vuçiç gjatë qëndrimit në Tiranë, pritet të takohet dhe me zyrtarë të tjerë përfshirë kreun e bashkisë së Tiranës, por këto takime ende nuk janë konfirmuar.
Në ditën e dytë të vizitës në Tiranë, Vuçiç do të marrë pjesë në “Forumin Ekonomik të Vjenës”, ku do të bashkohen kryeministrat e vendeve të Adriatikut dhe Detit të Zi. /Shekulli/
