Pranimi i Kosovës në UNESCO do të ishte vendim vetëshkatërrues dhe do të ishte absurde, pikërisht sikur dikush të propozonte që edhe Shteti Islamik të bëhej anëtar i kësaj organizate.
Kështu ka vlerësuar ministri i Jashtëm Serb, Ivica Daçiq, i cili ka krahasuar Kosovën me Shtetin Islamik për sa i përket ruajtjes së trashëgimisë kulturore.
“Trashëgimia kulturore në Kosovë, ku katër nga tempujt tonë të shenjtë janë deklaruar si trashëgimi kulturore botërore – Manastiri i Deçanit, Patrikana e Pejës e e Graçanicës dhe kisha e Shën Premtës në Prizren, UNESCO i ka shpallur si trashëgimi e mbrojtur kulturore për shkak se ishin në rrezik. Dhe nga kush ishin në rrezik? Propozimi i Kosovës në UNESCO do të ishte sikurse të kërkohej që Shteti Islamik – ISIS-i, të anëtarësohej në këtë organizatë. Cili është dallimi?”, ka pyetur Daçiq, transmeton Koha.net.
Ai ka shtuar se Shqipëria e ka vënë në rend të ditës anëtarësimin e Kosovës në UNESCO jashtë procedurave standarde.
Zëvendëskryeministri serb ka thënë se, që kur KFOR-i është në Kosovë, janë shkatërruar mbi 200 kisha, manastire e objekte tjera të trashëgimisë kulturore, se ato janë shkatërruar me dinamit, se janë djegur dhe shkatërruar mbi 8 mijë varre.
Në fund, ai ka paralajmëruar se vendi i tij do të luftojë deri në pafundësi për të parandaluar anëtarësimin e Kosovës në UNESCO.
Ndërkaq, i menjëhershëm ka qenë edhe reagimi i Qeverisë së Kosovës ndaj deklaratave të Daçiqit. Zv/ministri i Administrimit të Pushtetit Lokal, Bajram Gecaj e ka quajtur kriminale deklaratën e Ministrit të Jashtëm të Serbisë, Ivica Daçiq se pranimi i Kosovës në UNESCO është njësoj si pranimi i ISIS-it në këtë organizatë.
“Deklarata e ministrit të Jashtëm të Serbisë, Ivica Daciq, edhe një herë dëshmon se as Daçiq dhe as politika serbe ende nuk po mund të shkëputen plotësisht nga e kaluara kriminale e shtetit të Serbisë. Daçiq ishte pjesë e regjimit të Serbisë në kohën kur ai regjim në mënyrë të organizuar dogji mbi 200 xhami dhe objekte të tjera të kultit në Kosovë, mbylli shkollat dhe fakultetet në gjuhën shqipe, grabiti pasuritë e trashëgimisë kulturore…”, ka shkruar Gecaj në reagim.
Sipas tij, deklarata e tillë e Daçiqit e vështirëson edhe më shumë përmirësimin e raporteve ndërshtetërore mes Kosovës e Serbisë.
“Ndërsa tani, mu ai mundohet të barazoi një krim të tillë, të organizuar dhe të planifikuar nga organet e tyre shtetërore, me një pakënaqësi të rastit të disa njerëzve në Kosovë, pakënaqësi të cilën institucionet e Kosovës, jo vetëm që nuk e organizuan, por që bën çmos për parandalimin dhe në fund edhe dhënien fund të saj”, ka përfunduar Gecaj.
