Punëtori i Kompanisë ‘Uniteti’, Fehmi Aliu, i cili është sulmuar të mërkurën nga serbët gjatë kohës kur po punonte me eskuvator rindërtimit të shtëpive të shqiptarëve në ‘Kroin e Vitakut’ në veri të Mitrovicës, ka sqaruar ngjarjen si ka ndodhur incidenti.
Sipas tij, me të parë eskuvatorin në lagje duke punuar, fillimisht rreth 7-8 serbë janë tubuar menjëherë dhe kanë urdhëruar që të ndërpriten punimet, ndërsa më vonë numri tyre është rritur shumë shpejtë.
“Kanë filluar të na gjuajnë me tulla, copa të asfaltit dhe me gjithçka që kanë mundur, duke i thyer xhamat e bagerit, ndërsa unë kam pësuar edhe lëndime të lehta në kokë dhe trup”, ka thënë mes tjerash Aliu.
Ai tha se është dërguar në spitalin rajonal në jug të Mitrovicës ku ka kërkuar ndihmën mjekësore, ndërsa më vonë ka dhënë deklaratë edhe në polici rreth ngjarjes, përkatësisht në stacionin që ndodhet në veri të Mitrovicës.
“Përkundër krejt asaj që ka ndodhur sot, unë prap do të shkoj të punoj në veri, në mënyrë që shqiptarët të kthehen sa më shpejtë në shtëpitë e tyre”, theksoi Aliu. /Kosovapress/
