Drejtoria e Inspektoratit e Kryeqytetit ka njoftuar se asnjë objekt nuk do të lejohet të vihet në përdorim pa kaluar Inspektimin Final dhe pa u pajisur me Certifikatën e Përdorimit, duke theksuar se kjo masë synon mbrojtjen e jetës, shëndetit dhe sigurisë së qytetarëve, si dhe zbatimin e legjislacionit në fuqi në fushën e ndërtimit.
Përmes një njoftimi publik, Inspektorati bëri të ditur se detyrimi vlen për objektet individuale dhe kolektive të banimit, objektet banesore-afariste, afariste, industriale, publike dhe çdo objekt tjetër që hyn në kategorinë e parë dhe të dytë sipas Ligjit për Ndërtim.
Sipas njoftimit, përdorimi i objektit lejohet vetëm pasi organi kompetent të ketë kryer Inspektimin Final dhe të ketë lëshuar Certifikatën e Përdorimit.
“ASNJË OBJEKT NUK MUND TË VIHET NË PËRDORIM PA INSPEKTIM FINAL DHE CERTIFIKATË TË PËRDORIMIT”, thuhet në njoftim.
Inspektorati ka paralajmëruar se para përfundimit të punimeve ndërtimore, investitorët do të njoftohen individualisht përmes një urdhërese inspektuese, me të cilën do të obligohen të mos e vënë objektin në përdorim, të mos ua dorëzojnë banesat apo lokalet shfrytëzuesve, të mos fillojnë aktivitetin ekonomik dhe të mos lejojnë vendosjen e banorëve derisa të përfundojë procedura ligjore.
“Çdo veprim në kundërshtim me këtë urdhëresë do të konsiderohet shkelje e vetëdijshme e detyrimeve ligjore dhe do të merret parasysh gjatë procedurave inspektuese”, theksohet në njoftim.
Njëkohësisht, Drejtoria e Inspektoratit u ka bërë thirrje qytetarëve dhe blerësve të banesave që të mos pranojnë në dorëzim objekte pa Certifikatë të Përdorimit.
“Mos pranoni në dorëzim banesa, lokale afariste apo objekte të tjera dhe mos filloni përdorimin e tyre pa Certifikatë të Përdorimit. Pranimi i një objekti pa këtë certifikatë nënkupton se objekti ende nuk është verifikuar zyrtarisht nëse plotëson kushtet ligjore dhe teknike për përdorim të sigurt”, thuhet në njoftim.
Inspektorati paralajmëroi se ndaj çdo objekti që vihet në përdorim në kundërshtim me ligjin do të ndërmerren masa, duke përfshirë ndërprerjen e menjëhershme të përdorimit, lirimin e objektit deri në pajisjen me certifikatë, gjoba administrative, procedura të tjera ligjore dhe ekzekutimin e masave inspektuese në rast të mosrespektimit të urdhrave.
Drejtoria e Inspektoratit thekson se Inspektimi Final dhe Certifikata e Përdorimit nuk janë vetëm procedura administrative, por garanci për sigurinë e qytetarëve.
“Inspektimi Final dhe Certifikata e Përdorimit nuk janë formalitete administrative. Ato janë mekanizmat ligjorë përmes të cilëve verifikohet nëse objekti mund të përdoret pa rrezikuar jetën, shëndetin dhe sigurinë e qytetarëve. Për këtë arsye, Drejtoria e Inspektoratit nuk do të tolerojë vënien në përdorim të asnjë objekti në kundërshtim me kërkesat ligjore”, thotë njoftimi.
