Presidenti Donald Trump thotë se programi i raketave balistike dhe i armëve bërthamore të Koresë së Veriut paraqet një kërcënim për të gjithë botën, që kërkon marrjen e masave në shkallë botëtore.”
Gjatë një konference shtypi në Seul me Presidentin jugkoran Moon Jae-in, zoti Trump tha se është e papranueshme që vende të ndryshme të ndihmojnë me armatime dhe financime regjimin e Kim Jong Un-it.
Ai tha se “…Shtetet e Bashkuara janë të përgatitura të vetëmbrohen dhe aleatët e tyre do të përdorin fuqitë e tyre ushtarake të pashoqe, në se do të jetë e nevojshme.”
Trump tha se Shtetet e Bashkuara dhe Koreja e Jugut nuk mund ta lejojnë Phenianin “të kërcënojë gjithçka që kemi ndërtuar”, që nga koha e Luftës Koreane 6 dekada më parë. Ai e akuzoi udhëheqësin koreanoverior për kërcënimin e panevojshëm të miliona jetëve të pafajshme.
Duke shtuar se Uashingtoni dhe Seuli janë duke punuar së bashku për një zgjidhje paqësore të situatës me Korenë e Veriut, zoti Trump tha: “Mendoj se është mirë që Koreja e Veriut të bëjë gjënë e duhur, duke ardhur në tryezën e negociatave.”
