![](https://infosot.com/wp-content/uploads/2017/12/xhamia-ch131702.jpg)
Me rastin e një kontrolli të bërë të shtunën e kaluar në kantierin e ndërtimit të xhamisë “Ebu-Hanife” në Grenchen të Bernës, njëri nga punëtorët e kontrolluar ka marrë vrapin.
Njëri nga policët është vënë në ndjekje pas tij dhe pasi ka humbur drejtpeshimin, është rrëzuar në një gropë tre metra të thellë. Ai ka qenë me fat që nga ky rrëzim nuk ka pësuar asnjë lëndim, shkruan “Grenchner Tagblatt”.
Kontrollimi ishte bërë pasi që qarkullonin informata se në këtë kantier punohej me të madhe gjatë fundjavave. Policët me këtë rast kishin takuar tetë persona me prejardhje të huaj duke punuar në brendi të ndërtesës, transmeton Albinfo.ch. Pasi që policia ua kishte marrë dokumentet e identifikimit për t’ua kontrolluar, njëri prej tyre ikën befasisht nga aty ndërsa një polic i vihet pas. Por, ky i fundit zë në thua dhe bie në gropë, e cila, për fat ishte e zbrazët dhe polici shpëton pa asnjë lëndim.
Por, personi i ikur nuk u kap dot. Sidoqoftë, dokumentet e tij janë në duar të policisë. Dhe, ato tregojnë se ai kishte një ndalesë për hyrje në Zvicër që domethënë ai po qëndronte dhe po punonte ilegalisht. Ndërsa, siç tregon komandanti i policisë, Alexander Ambühl, asnjëri nga të pranishmit nuk pranonte ta kishte njohur personin në fjalë. Nuk ishte gjetur asnjë njeri që do të mbahej përgjegjës për punimet që kryheshin. Ata thjesht, kishin thënë se kishin ardhur të punonin vullnetarisht.
Një person përgjegjës më vonë ka deklaruar se këtu punonin shumë besimtarë, ndihmës vullnetarë që nuk duhet ngatërruar me punëtorë ilegalë. Po ashtu kishte disa kompani të cilat punën e tyre e kishin deleguar te disa kompani tjera më të vogla, kështu që ishte pothuaj e pamundur të mbikëqyrej gjendja, gjegjësisht të dihej se kush hynte e kush dilte aty.
Ndërtimi i xhamisë kishte filluar me probleme. Ai ishte bërë lajm për mediet zvicerane kur, gjashtë vite më parë persona të panjohur kishin vendosur një derr të ngordhur dhe katër koka derrash në truallin ku kishte filluar ndërtimi, shkruan Albinfo.ch. Po ashtu, e kishin spërkatur truallin me rreth 100 litra gjak derri, me mendimin se kështu do ta pengonin ndërtimin e xhamisë. Fajtorët nuk janë kapur kurrë.
Përgjegjësi i kantierit, i cili nuk e tregon emrin, thotë se ai i mban listat e të gjithë atyre që punojnë në kantier. “Ne në të kaluarën kemi pasur shumë kërkesa të bashkatdhetarëve nga Maqedonia dhe Shqipëria të cilët dëshironin të punonin vullnetarisht në ngritjen e xhamisë. Por ne i kemi refuzuar të gjithë. Ne punësojmë vetëm njerëz që janë me qëndrim në Zvicër. Ata janë shumica nga regjioni ndërsa me myslimanët e vendeve arabe, kjo bashkësi fetare nuk ka të bëjë aspak.
Sa u përket punëtorëve të kontrolluar në rastin e të shtunës së kaluar, ai thotë se duhet të jenë nga Gjeneva, ku është selia e njërës firmë të cilës i ishte deleguar puna nga një firmë e Friburgut. Njëri nga këta punëtorë ka qenë edhe ai që kishte ikur nga policia pasi që po qëndronte ilegalisht në Zvicër, transmeton Albinfo.ch. “Ne nuk mund të luajmë rolin e policit këtu dhe të verifikojmë në hyrje të kantierit secilin punëtor që vjen të punojë këtu”, thotë përgjegjësi.
Më tutje gazeta, duke cituar përgjegjësin në fjalë, shkruan se janë detyruar t`i mbyllin të gjitha hyrjet e ndërtesës, pasi që disa javë më parë kishte ndodhur sërish një akt vandalist. Persona të panjohur kishin depërtuar ne ndërtesë dhe kishin spërkatur muret e brendshme dhe dyshemenë me gjak derri. Udhëheqësit kanë ushtruar padi për këtë dhe për grafitet e shkruara në fasadë. Persona të panjohur, në natën e të enjtes së kaluar kishin shkruar parullën “Shit Islam”.