Paul Pogba për Juventusin vlen më shumë se 100 milionë Euro, dhe të gjitha skuadrat e interesuara për të nëse dëshirojnë të firmosin me mesfushorin francez, duhet të përgatisin një ofertë më të lartë pasi vetëm kështu mund të bindin klubin bardhezi të lejojë largimin e lojtarit. Mediat italiane kanë zbuluar një prapaskenë me të vërtetë interesante përsa i përket të ardhmes së futbollistit 23-vjecar. Verën e kaluar Chelsea u vendosi në pjatë kampionëve të Italisë mbi 90 milionë Euro për kartonin e Pogba por drejtuesit e Juventusit e refuzuan ofertën që kapte shifrën e 95 milionë Eurove duke vendosur ta mbajnë në skuadër mesfushorin francez.
Jose Mourinho, në atë periudhë nën drejtimin e Bluve të Londrës, e dëshironte me cdo kusht lojtarin në “Stamford Bridge”, por drejtuesit e Chelsea-it nuk arritën dot ta vendosnin në dispozicion të portugezit 23-vjecarin. Një sinjal mëse i qartë ky nga Zonja e Vjetër me Juventusin që kërkon mbi 100 milionë Euro për Paul Pogba. Mbetet për t’u parë nëse drejtuesit bardhezi do ta mbajnë në skuadër lojtarin e përfaqësues së Gjelave edhe gjatë sezonit të ardhshëm apo do të dorëzohen ndaj ndonjë ofertë më të lartë se 95 milionë Euro që mund të vijë në drejtim të tyre për shërbimet e lojtarit. Paul Pogba pëlqehet nga disa prej klubeve më të mëdha të Europës, ku spikasin Reali i Madridit, Barcelona, Manchester City dhe Chelsea.
