Vazhdon të mbetet mister largimi i deputetes Donika Kadaj- Bujupi nga Aleanca për Ardhmërinë e Kosovës. Thuajse janë bërë një javë që kur Bujupi u largua nga AAK dhe askush as nga partia e drejtuar nga Haradinaj e as vetë deputetja nuk kanë dhënë arsye të saktë për këtë rast.
As njëra nga bashkëpunëtoret e Donika Kadaj- Bujupit, deputetja Teuta Haxhiu nuk ka ide pse u largua ish- shefja e Grupit Parlamentar.
“Sinqerisht nuk kam ide pse është larguar. Ajo asnjëherë nuk ka shfaqur pakënaqësi e as ndonjë ankesë. Ka qenë befasi për të gjithë ne. Nga mediet e kam kuptuar se është larguar. E kam provuar atë ditë disa herë në telefon, por nuk është përgjigjur dhe më nuk kam komunikuar me të”, ka thënë Haxhiu në emisionin Interaktiv, raporton Gazeta Blic.
Ndërkaq, Gazeta Blic kishte raportuar se Donika Kadaj- Bujupi ishte ndjerë e zhgënjyer me vendin se ku u ul gjatë shënimit të “Epopesë së Dukagjinit” në Deçan, ku u ul në rendin e dytë.
Është raportuar se ajo do t’i bashkohet Lëvizjes Vetëvendosje, mirëpo ende nuk ka asgjë konkrete.
