Partia Demokratike e Kosovës e ka dënuar rastin e tentim djegjes së veturës së deputetit Adem Grabovci.
Sipas PDK-së ky rast është një veprim kriminal, që në vazhdën e sulmeve të ngjashme që po ndodhin ndaj zyrtarëve të shtetit të Kosovës, kanë për synim të krijojnë klimën e frikës dhe pasigurisë në shoqërinë kosovare.
“Partia Demokratike e Kosovës konsideron se veprimet e tilla, qartësisht anarkiste dhe antidemokratike, janë duke cenuar vlerat themelore mbi të cilat bazohet shteti ynë, sikurse është sundimi i ligjit dhe vlerat morale mbi të cilat është e bazuar vet shoqëria jonë të tilla si paprekshmëria e familjes dhe pronës private”.
“Duke cenuar këto vlera morale, ideatorët e këtyre veprimeve po synojnë të bartin konfliktin politik nga institucionet në jetën familjare dhe qytetare”.
Partia Demokratike e Kosovës njëherit ka kërkuar nga mekanizmat institucionalë të sigurisë që t’i zbardhin, sa më parë që është e mundur, autorët e këtyre veprimeve dhe t’i vënë ata para drejtësisë.
Sqarim:
Ndalohen fyerjet dhe përdorimi i gjuhës ofenduese. INFOSOT mban të drejtën e publikimit ose jo të një komenti të caktuar. Përmbajtja e komenteve nuk pasqyron, qëndrim editorial të redaksisë së portalit INFOSOT. Ju faleminderit për mirëkuptimin!
© infosot.com
