Grupi i kuvendarëve të PDK-së në Kuvendin e Komunës së Ferizajt ka dalë sot me një sqarim rreth kërkesës që ka bërë për shkarkimin e kryetarit të Ferizajt, Muharrem Sfarqa.
Në sqarim theksohet se më 30 shtator Grupi Parlamentar i PDK-së, siç u thuhet në sqarim këshilltarëve, anëtarë të Kuvendit të Komunës së Ferizajt, kemi dorëzuar një kërkesë në Ministrinë e Pushtetit dhe Administrimit Lokal. Kërkesa jonë është e bazuar në dy ligje: Ligjin për vetëqeverisje lokale dhe Ligjin për menaxhimin e financave publike dhe përgjegjësitë.
Në bazë të këtyre dy ligjeve, Qeveria e Kosovës obligohet që ta suspendojë kryetarin e komunës, z. Muharrem Sfarqa, dhe pastaj, nëse vërtetohen shkeljet nga Gjykata Kushtetuese, edhe ta shkarkojë atë. Kërkesën tonë për këtë qëllim e kemi shoqëruar me dëshmi të shumta për shkelje edhe të ligjeve të tjera, si: Ligjit për buxhet, Ligjit të prokurimit publik, Ligjin për menaxhimin e financave publike dhe përgjegjësitë, Ligjit për shërbimin civil, Statutin e Komunës etj. Për të gjitha këto shkelje që i ka bërë Kryetari ynë, ne kemi reaguar me kohë, si gjatë mbledhjeve të Kuvendit Komunal ashtu edhe me konferenca e debate tjera publike.
Por, kryetari ka vazhduar me avazin e njëjtë të shkeljeve ligjore.
Ne kemi zgjedhur rrugën, të cilën ende asnjë komunë në Kosovë nuk e ka bërë. Rrugën e institucioneve qendrore që e kanë për detyrë vëzhgimin dhe kontrollimin e punës së pushteteve lokale.
Ne po e vëmë në sprovë Qeverinë e Kosovës.
Po kërkojmë zbatim të ligjit lidhur me shkeljet ligjore që i ka bërë Kryetari i Komunës së Ferizajt.
Sepse aty ku respektohet dhe mbrohet ligji, aty ka siguri.
Aty ku ka siguri ka edhe shpresë!
Besojmë që, pas reflektimit të Qeverisë së Kosovës, qytetarëve tanë, u kthehet shpresa për një shtet më të fortë për të cilën kemi ëndërruar e luftuar me shekuj, përfundon sqarimi.
