Kryetari i Organizatës së Veteranëve të Luftës së UÇK-së, Hysni Gucati, së bashku me bashkëpunëtorë, ka pritur në takim ambasadorin e Mbretërisë së Bashkuar në Kosovë, Jonathan Hargreaves.
Sipas njoftimit të OVL-UÇK-së, gjatë takimit janë diskutuar çështjet dhe shqetësimet kryesore të veteranëve të UÇK-së, si dhe zhvillimet aktuale që lidhen me ta.
“Gjatë takimit u diskutua për çështjet dhe preokupimet kryesore të veteranëve të UÇK-së, si dhe për zhvillimet aktuale që lidhen me ta”, thuhet në njoftim.
OVL-UÇK ka theksuar rëndësinë e marrëdhënieve ndërmjet Kosovës dhe Mbretërisë së Bashkuar, duke vlerësuar mbështetjen e vazhdueshme britanike për Kosovën.
“Në këtë takim theksuam rëndësinë e miqësisë së qëndrueshme dhe partneritetit ndërmjet Kosovës dhe Mbretërisë së Bashkuar, duke vlerësuar lart mbështetjen dhe kontributin e saj të vazhdueshëm për vendin tonë”, thuhet në njoftim.
Organizata ka vlerësuar se takime të tilla janë të rëndësishme për përcjelljen e drejtpërdrejtë të qëndrimeve dhe kërkesave të veteranëve te partnerët ndërkombëtarë të Kosovës.
“Takime të tilla janë të rëndësishme për të përcjellë drejtpërdrejt zërin e veteranëve tanë te miqtë dhe partnerët ndërkombëtarë të Kosovës”, thuhet në njoftimin e OVL-UÇK-së.
