Asnjë ofertë nuk do ta pranojë opozita nga pushteti, pos datës së zgjedhjeve të jashtëzakonshme.
Kryetari në detyrë i PDK-së, Kadri Veseli, që është kryetar i Kuvendit, javën e shkuar tha se shpejt opozita do ta ketë një ofertë serioze që do të çojë drejt tejkalimit të krizës dhe zor që do të mund ta refuzojnë atë, raporton KTV.
Por, në Vetëvendosje, deklaratat e Veselit po i quajnë të një njeriu që po mundohet të imponohet si lider.
Thonë se opozita nuk është për të tregtuar me oferta, por e vetmja rrugëdalje sipas tyre, janë zgjedhjet e jashtëzakonshme.
Edhe shefja e deputetëve të AAK-së, Donika Kadaj Bujupi, ka thënë se krejt çka mund të ofrojë pushteti do të mund të jenë dorëheqja e qeverisë dhe një datë zgjedhjesh të jashtëzakonshme.
AAK-ja pret që ekzekutivi të reflektojë shpejt në kërkesën e tyre.
Të premten që shkoi, kreu i Kuvendit, Kadri Veseli, foli për një ofertë që shpejt do t’i bëhet opozitës, e që tha se do të ketë transparencë maksimale, por në asnjë rast nuk ka treguar se çka do të përfshijë ajo ofertë.
Kur u pyet nga gazetarët nëse oferta nënkupton edhe zgjedhje të parakohshme, në asnjë rast nuk i ka pohuar e as mohuar ato, por ka thënë se gjithçka mund të arrijnë bashkërisht, veç pa ultimatume.
Ndryshe, KTV-ja ka provuar të vejë kontakt me zyrtarë të PDK-së, por një përgjigje nga ta ka qenë e pamundur, transmeton Koha.net.
‘Koha Ditore’, nga burime të saj, ka raportuar se oferta e Kadri Veselit për opozitën nuk i përjashton zgjedhjet e parakohshme, por kjo ofertë do t’i bëhet opozitës vetëm pasi Hashim Thaçi të betohet si president i Republikës e vetë Kadri Veselit të zgjidhet kryetar i PDK-së.
