Ndihmës-sekretarja e Departamentit Amerikan të Shtetit, Viktoria Nuland deklaroi se gjatë ditëve në vijim do të zhvillohet dialog i vërtetë politik për daljen e vendit nga kriza. Pas takimeve intensive me krerët politikë, ajo shfaqi optimizëm se megjithatë katër forcat politike mund të arrijnë në një marrëveshje dhe t’i japin fund krizës në vend. Përkushtimi i SHBA-ve për të asistuar në këto procese të rëndësishme ngelet i njëjtë, – garantoi Nuland, e cila tha se po e linte Shkupin e inkurajuar.
Për dallim nga partitë politike nënshkruese të Marrëveshjes së Përzhinos, Nuland ka konfirmuar se në bisedime po flitet se si të zgjerohet me struktura shtesë Prokuroria Speciale Publike, edhe pse nuk zbuloi detaje.
“Ne përkrahim punën e Prokurorisë Speciale Publike. Sa i përket strukturës së saj shtesë, ka disa ide që janë ofruar, më e rëndësishme është që sistemi të jetë llogaridhënës dhe efektiv”, tha Nuland.
Sipas saj, dukshëm ka pasur një progres të caktuar na aplikimin e Marrëveshjes së Përzhinos. Ajo tha se tani është koha të ndërmerren hapa konkretë për ta vënë Maqedoninë në binar drejt zgjedhjeve të lira dhe fer.
“Partitë më të mëdha kanë diskutuar për zgjedhje disa here para se të vija unë. Sot u takova me katër partitë dhe po iki nga Shkupi e inkurajuar nga ajo çka dëgjova. Ditët në vijim ne shpresojmë se ekipet negociuese do të pajtohen me idetë që janë në tavolinë dhe t’i hapin rrugë zgjedhjeve. Do të duhet vullnet, unë pash vullnet në takimet e sotme me to. Gjithsesi ambasadori Bejli dhe ekipi ynë do të vazhdojnë punën për të pajtuar palët drejt një marrëveshjeje, sa më shpejt që mundet”, deklaroi Nuland.
Përveç shpejtimit të procesit drejt zgjedhjeve fer dhe demokratike Nulan foli për nevojën dhe rëndësinë e forcimit të drejtësisë dhe sundimit të ligjit në Maqedoni. Me ç’rast theks të veçantë vuri mbi Prokurorinë Speciale Publike.
“Qëllimi im i dytë është të ndihmoj dhe mbështes procesin e forcimit të drejtësisë dhe sundimin të ligjit, në Maqedoni. Pata rastin të flas me pjesëtarë të sektorit civil, aktivistë dhe gazetarë, për t’i inkurajuar për punën që po e bëjnë. Pata rastin ta takoj edhe zonjën Janeva dhe ekipin e saj. Puna e saj është tejet e rëndësishme për ta sjellë sundimin e ligjit- diçka që është e rëndësishme nëse Maqedonia tenton të bëhet pjesë e BE-së”, përfundoi Nuland.
Prokuroria Speciale Publike gjatë punës së saj ka hasur në shumë obstruksione. Gjykatat nuk kanë përfillur kërkesat e PSP-së për persona, kryesisht nga strukturat e pushtetit, që kjo e fundit i ka shpallur si të dyshuar për vepra penale. Një tentim për ta penguar punën e PSP-së provoi edhe presidenti i shtetit Gjorge Ivanov, me faljet për të gjithë që janë nën hetime për korruspion, keqpërdorime dhe krime të tjera, por pa sukses.
TEMAT:MAQEDONINULANDKRIZA
