U zhvillua sot në Prizren seanca e gjykimit ndaj drejtorit të Arsimit dhe dy mësimdhënësve që akuzohen për keqpërdorim të manifestimit “Java e Remzi Ademajt”.
Pas leximit të aktakuzës nga prokurori i shtetit Mehdi Sefa, asnjëri nga të akuzuarit nuk pranoi fajësinë për veprat penale me të cilat ngarkohen.
Në fjalën hyrëse prokurori Sefa përmendi provat kyçe mbi të cilat do të bazohet.
“Mund të përmendi raportin e ekspertit financiar, Agim Kastratit, si dhe provat materiale të transaksioneve bankare të këtu të akuzuarve Nexhat Çoçaj, Bekim Thaçi dhe Bedri Çeku, kanë kryer në cilësi të zyrtarëve në Javën Remzi Ademaj,” tha prokurori.
Pas fjalëve të prokurorit, mbrojtja e të akuzuarve e paralajmëroi trupin gjykues se do të kërkojë ekspertizë të re financiare, gjë e cila u lejohet me ligj.
I akuzuari Nexhat Çoçaj, drejtor i Arsimit në Komunën e Prizrenit ia bëri të ditur trupit gjykues se do të paraqesë 1 mijë e 200 dëshmitarë.
Ai tha se do t’i sjellë në gjykatë të gjithë nxënësit që kanë marrë shpërblime deri në 20 euro gjatë manifestimeve të javës që tradicionalisht i kushtohet ish-komandantit të UÇK-së Remzi Ademajt.
Si dëshmitar sot u paraqit Arbër Rexhaj nga Lëvizja “Vetëvendosje”. Rexhaj që në vitin 2012 kishte qenë kryetar i LVV-së, kishte parashtruar kallëzim penal në prokurori ndaj tani të akuzuarve Nexhat Çoçaj dhe Bekim Thaçi.
Rexhaj tregoi se kallëzimin penal e kishin hartuar juristët e “Vetëvendosjes” pasi kishin vërejtur parregullsi në transaksione bankare.
“Ato transaksione ashtu siç përmendet edhe në kallëzimin penal janë bërë nga drejtori i Arsimit Nexhat Çoçaj dhe mësimdhënësi Bekim Thaçi,” tha Rexhaj.
“Vetëvendosje” ngriti këtë kallëzim penal, pasi siguroi gjendjen e llogarive bankare të Nexhat Çoçajt dhe Bekim Thaçit.
Për këto xhirollogari nën akuzën për zbulim të fshehtësisë zyrtare është dënuar me 5 mijë euro gjobë Abdullah Thaçi, ish-punëtor i Bankës “Pro Credit”. /kallxo.com/
