Ndërmjet 1 e 24 janarit kanë ndodhur 998 aksidente, tri prej tyre me fatalitet. Krahasuar me vitin e kaluar, numri i aksidenteve në përgjithësi dhe i atyre me fatalitet në veçanti ka qenë më i ulët.
Ndërmjet 1 dhe 24 janarit, Policia e Kosovës ka regjistruar gjithsej 998 aksidente rrugore. Disa prej këtyre aksidenteve janë rezultat i ngricave në rrugë dhe i mospastrimit të tyre pas reshjeve të dendura të borës.
Megjithatë, krahasuar me të njëjtën periudhë të vitit të kaluar, numri i aksidenteve në përgjithësi, dhe i atyre me fatalitet në veçanti, është më i vogël.
Daut Hoxha, zëdhënës i Policisë, ka treguar për KALLXO.com se ndërmjet 1 e 24 janarit 2016 janë regjistruar 998 aksidente.
Prej tyre, tri aksidente kanë qenë me fatalitet (katër veta kanë humbur jetën), 258 me lëndime dhe 737 kanë përfunduar me dëme.
Sipas statistikave të Policisë, krahasuar me të njëjtën periudhë të vitit 2015, ky janar ka pasur rënie të aksidenteve në total dhe të aksidenteve me të vdekur.
Ndërmjet 1 dhe 24 janarit 2015, Policia ka regjistruar katër aksidente me fatalitet (gjashtë të vdekur), 253 aksidente me lëndime dhe 806 me dëme. Pra, në total kanë ndodhur 1,063 aksidente.
Pra, shihet se në të njëjtën periudhë kohore, këtë janar (2016) ka pasur 65 aksidente më pak.
Ndryshe, KALLXO.com më 4 janar ka shkruar se brenda një dite kanë ndodhur 109 aksidente. Prej tyre, 90 kanë përfunduar me dëme materiale dhe 19 me të lënduar dhe asnjë me të vdekur.
Gjatë 24-orëshit për të cilin ishte raportuar atë ditë kanë ndodhur një seri aksidentesh zinxhir, shkaku i reshjeve intensive të borës dhe vështirësive për të qarkulluar rrugëve që nuk janë pastruar nga bora.
