Kryeministri Isa Mustafa tha se me dërgimin e marrëveshjes për Asociacionin e Komunave me Shumicë Serbe nga ana e Presidentes Atifete Jahjaga në Kushtetuese, nuk po shfuqizohet kjo marrëveshje. Thotë se kështu, po verifikohet nëse gjithçka është në harmoni me Kushtetutën.
“Vlerësojmë se është një hap i mirë sepse është Gjykata Kushtetuese ajo që do ta jap vlerësimin më meritor lidhur me atë se a është kjo marrëveshje në harmoni të plotë me Kushtetutën e Republikës së Kosovës apo jo. Një gjë të tillë, ne e kemi paraparë edhe me marrëveshje sepse pjesë e kësaj marrëveshje është që ajo, në të gjitha fazat, të shkojë për mendim në Gjykatën Kushtetuese. Prandaj, kjo nuk paraqet kurrfarë bllokimi ose suprimimi të marrëveshjes sonë që e kemi bërë në Bruksel, por është një prej procedurave në të cilat ne e verifikojmë përshtatshmërinë e kësaj marrëveshje me Kushtetutën e Republikës së Kosovës”, theksoi Mustafa në mbledhjen e sotme të Qeverisë.
