Cristiano Ronaldon, sidomos në këtë sezon, vijon të përndjekë shprehja “Nuk arrin të shfaqet në ndeshjet e mëdha”. Mirëpo historia e sfidave “El Clasico” tregon të kundërtën. Të shtunën në “Camp Nou” do të zhvillohet përplasja numër 25 mes portugezit dhe rivalit të tij të madh te Barcelona, Lionel Messi. Dy “yjet” e futbollit janë fituesit e “Topit të Artë” në 10 edicionet e fundit. Cristiano ka mundur të shënojë në 13 “El Clasico”, ndërsa Lionel në 10 prej tyre. Baraspeshë e plotë përsa u përket golave të shënuar. Secili prej tyre ka mundur t’i shënojë 15 gola rivalit të përjetshëm kur të dy kanë qenë në fushë. Peshorja anon ndjeshëm nga sulmuesi argjentinas për sa i përket fitoreve, pasi në 12 raste ka triumfuar Messi, në 6 Ronaldo, ndërsa 6 përballje mes tyre kanë përfunduar në barazim.
Cristiano 60% të golave, më saktësisht 9, i ka shënuar në “Camp Nou”, ndërsa Messi në “Santiago Bernabeu” ka realizuar një më shumë, 10. Gjithmonë bëhet fjalë për sfidat kur të dy kanë qenë kundërshtarë me njëri-tjetrin. Që nga sezoni 2011-2012, Ronaldo ka shënuar në 4 nga 5 ndeshjet radhazi në “Camp Nou”. Nëse arrin të shënojë edhe këtë të shtunë, do të shndërrohet në golashënuesin e tretë më të mirë në “El Clasico’, duke parakaluar Raul Gonzalesin. I pari mbetet Messi e 21 finalizime, i ndjekur nga legjendari Di Stefano me 18 gola.
Ronaldo – Messi jo më kot përkufizohet dueli klasik në “El Clasico”. Që kur mbërriti në Spanjë, portugezi nuk është aktivizuar në vetëm një superpërballje Real Madrid – Barcelona, pikërisht në finalen e Kupës së Mbretit në vitin 2014, që u fitua 2-1 nga Los Blancos. Nga ana tjetër, që kur luajti për herë të parë në El Clasico, në moshën 18-vjecare, Messi nuk ka mundur të aktivizohet në vetëm 2 raste, në 2006-tën dhe 2007-ën, ndërsa në 28 sfidat e fundit ka qenë gjithmonë i pranishëm në fushë. Të vetmit lojtarë që kanë luajtur në më shumë ndeshje “El Clasico” radhazi se Messi janë Gento, 35, Casillas 30 dhe Raul 29.
