Ish-prokurorja Maria Bamieh, e cila e ka çuar EULEX-in në një gjykatë britanike për punësim për shkarkim të dyshuar të paligjshme nga puna, tha ditën e enjte se ish-punëdhënësit e saj po përpiqeshin ta trembnin atë në heshtje mbi akuzat për korrupsion brenda organizatës, gjë që bëri që ajo të humbte punën e saj.
Firma ligjore “Bindmans”, e cila po përfaqëson Bamiehin në Gjykatën e Punësimit në Londër, tha se EULEX-i e kishte kërcënuar se do ta ndiqte penalisht nëse ajo i tregon detaje të akuzave të saj njerëzve jashtë kësaj çështjeje.
Bamieh tha se kjo nënkuptonte se EULEX-i po përpiqej të sigurohej se akuzat e saj do të kalonin pa u ndjerë, raporton kallxo.com.
Por, EULEX-i hodhi poshtë akuzat dhe tha se sipas udhëzimeve të Ministrisë së Drejtësisë në Britani mbi gjykatat e punësimit, “dokumentet dhe deklaratat nuk duhet të përdoren për ndonjë qëllim tjetër përveçse për drejtim të çështjes” dhe se nuk duhet t’ju tregohen njerëzve të përfshirë në çështje, avokatëve të tyre apo dëshmitarëve nëse është e nevojshme.
Në tetor 2014, Bamieh, një avokate britanike, akuzoi ish-kolegun e saj e EULEX-it, gjykatësin italian Francesco Flori, se kishte marrë ryshfet 300 mijë euro për të deklaruar të pafajshëm për vrasje një të akuzuar, si edhe duke kërkuar një tjetër ryshfet për një rast korrupsioni kundër një zyrtari të Ministrisë së Transportit në Kosovë. Flori i mohoi me forcë akuzat.
Sot gjatë ditës Klan Kosova ka raportuar se Bamieh është kërcënuar me ndjekje penale nga EULEX nëse ajo zbulon çfarëdo detajesh të padisë së saj palëve që nuk janë të përfshira në padinë e ngritur prej saj ndaj këtij misioni. Zëdhënësit e këtij Misioni kanë thënë për këtë televizion se e mohojnë kategorikisht kërcënimin me burg, sepse sipas tyre ata nuk kanë as juridiksion për ta bërë këtë.
Ata në fund thanë se Misioni i EULEX në Kosovë është duke i ndjekur të gjitha procedurat e duhura ligjore dhe do të sjellë rastin para Gjykatës, e cila do të vendosë mbi këtë çështje.
