Kryetari i Skënderajt, Sami Lushtaku, i ka reaguar zyrtares së Lëvizjes Vetëvendosje, Dejona Mihali, pas deklaratave të saj të fundit ndaj tij.
Përmes një postimi në Facebook, Lushtaku ka hedhur akuza dhe ka ngritur një sërë pyetjesh lidhur me rolin e Mihalit në Vetëvendosje dhe në institucionet e pushtetit.
“Ti Dejona e Aleksandrit nga Greqia, meqë së fundi më ke përmendur shpesh, ta dish që grupi i vetëm kriminal për të cilin duhet të japni shumë përgjigje jeni ju”, ka shkruar Lushtaku.
Ai ka vënë në pikëpyetje ndikimin e Mihalit brenda Lëvizjes Vetëvendosje, duke pretenduar se ajo ushtron kontroll të madh mbi partinë dhe pushtetin.
“Kush je ti që kontrollon çdo gjë në Vetëvendosje? Si është e mundur që Vetëvendosje dhe i gjithë pushteti i saj në Kosovë të drejtohet nga një greke e dyshimtë? Prej nga vjen dhe kush të qëndron prapa?”, ka pyetur ai.
Lushtaku ka kërkuar gjithashtu sqarime për burimet e financimit dhe angazhimin e Mihalit në Kosovë.
“Kush të financon ty? Çfarë misioni ke në Kosovë? Për kë punon ti?”, ka shkruar ai.
Lushtaku ka ngritur pretendime të tjera, duke pyetur nëse Mihali është sjellë në Kosovë nga shërbime të huaja.
“A të ka sjellur në Kosovë shërbimi grek, serb apo rus?”, ka shtuar Lushtaku në postimin e tij.
