Përfaqësuesit e platformës “Liria ka Emër” kanë mbajtur të martën konferencë për media lidhur me organizimin e marshit të 12 shtatorit, duke njoftuar se do të organizohet transport nga qytete dhe komuna të ndryshme të Kosovës, në mënyrë që qytetarët të kenë mundësi të marrin pjesë në marsh pa pengesa për shkak të largësisë.
Marshi i 12 shtatorit i kushtohet ish-krerëve të Ushtrisë Çlirimtare të Kosovës (UÇK), ndërsa vendimi në rastin e tyre pritet të shpallet më 16 shtator.
Përfaqësuesi i “Liria ka Emër”, Ismail Tasholli, ka thënë se në ditët e fundit është vërejtur një mobilizim i jashtëzakonshëm i qytetarëve, duke theksuar se gatishmëria për pjesëmarrje në marshim po vjen nga vullneti i qytetarëve brenda dhe jashtë Kosovës.
“Gjatë ditëve të fundit kemi parë diçka që shkon përtej çdo organizimi. Kemi parë një gatishmëri të jashtëzakonshme të qytetarëve. Orët e pritjes brenda dhe jashtë Kosovës janë shndërruar në vend takimi e bashkimi. Kemi parë njerëz që kanë ardhur jo sepse dikush u ka kërkuar, por sepse e kanë ndjerë se duhet të jenë aty. Kemi parë qytetarë të moshave të ndryshme, familje, të rinj e të reja dhe bashkatdhetarë tanë që kanë shprehur vullnetin për të qenë pjesë e kësaj thirrjeje”, ka deklaruar Tasholli.
Ai ka folur edhe për aksionin e zhvilluar para EULEX-it, si dhe për ndezjen e zjarreve në zona të ndryshme të Kosovës, duke i cilësuar këto si shenja të kujtesës dhe solidaritetit.
“Zjarret e ndezura nëpër zona e kanë bartur një mesazh nga një cep i vendit në tjetrin. Kujtesa jonë është e gjallë dhe solidariteti ynë nuk është shuar. Ndërsa aksioni i sotëm para EULEX-it ishte vazhdimësi e kërkesës tonë për drejtësi. Por ajo që na jep më së shumti forcë sot është reagimi i qytetarëve. Po e ndjejmë mobilizimin kudo. Në çdo fshat brenda Kosovës, në çdo shtet dhe në diasporë njerëzit po organizohen, po telefonojnë, po pyesin dhe po kërkojnë të dinë se si mund të jenë pjesë e marshit”, ka thënë ai.
Sipas Tashollit, pjesëmarrja në marshin e 12 shtatorit pritet të jetë masive, duke e cilësuar atë si një bashkim të qytetarëve rreth kujtesës, solidaritetit dhe kërkesës për drejtësi.
“Dhe pikërisht kjo gatishmëri na bën të besojmë se në ditën e marshit nuk do të jemi thjesht shumë njerëz në një vend, do të jemi njerëz të bashkuar nga kujtesa, solidariteti dhe kërkesa për drejtësi. Do të jetë marshi më masiv ndonjëherë që ka pa Kosova”, është shprehur Tasholli.
Ai u ka bërë thirrje qytetarëve që t’i bashkohen marshit së bashku me familjet, miqtë dhe bashkatdhetarët.
“Prandaj, sot thirrja jonë shkon për secilin: ejani dhe bëhuni pjesë e marshit, ejani me familjet tuaja, me miqtë dhe me bashkatdhetarët tuaj. Le të jetë pjesëmarrja jonë masive, paqësore dhe dinjitoze!”, ka përfunduar ai.
Ndërkaq, përfaqësuesja tjetër e “Liria ka Emër”, Eliza Hoxha, ka bërë të ditur se, për shkak të interesimit të madh në terren, është paraparë organizimi i transportit nga të gjitha pjesët e Kosovës për qytetarët që dëshirojnë të marrin pjesë në marsh.
“Interesimi që po e shohim në terren na ka obliguar që organizimit t’i përgjigjemi me të njëjtën energji dhe përkushtim. Besoj e keni parë, ne veç po rrugëtojmë paralelisht, Ismaili diku, unë diku tjetër”, ka deklaruar Hoxha.
Ajo ka theksuar se transporti i organizuar synon që largësia të mos paraqesë pengesë për qytetarët që duan të marrin pjesë në marshin e 12 shtatorit.
“Për këtë arsye kemi menduar, si edhe herët e kaluara, të ketë transport të organizuar nga e gjithë Kosova, në mënyrë që largësia të mos jetë pengesë për askënd që ka dëshirë të jetë pjesë e të marshojë më 12 shtator për lirinë e çlirimtarëve”, ka thënë Hoxha.
Sipas saj, nisjet do të organizohen nga qytete dhe komuna të ndryshme të Kosovës, ndërsa detajet për pikat e nisjes, oraret dhe transportin do të bëhen publike përmes njoftimeve zyrtare.
“Nga qytetet dhe komunat anë e mbanë Kosovës do të organizohen nisje drejt marshit. Do t’i kemi agjendat, pikat e nisjes, oraret, detajet e transportit që do të jenë publike me kohë përmes njoftimeve tona zyrtare edhe në platformën ‘Liria ka Emër’, por edhe në mediat e ndryshme”, ka bërë të ditur ajo.
Hoxha ka përcjellë edhe një thirrje për qytetarët, duke theksuar se qëllimi i organizimit është bashkimi i njerëzve nga e gjithë Kosova në një mesazh të përbashkët.
“Mesazhi ynë është i thjeshtë: kudo që jeni, bëhuni gati, ejani, si përherë, me familje, me kolegë, me gjyshër e gjyshe e me fëmijë. Sepse këtë herë nuk po organizohet vetëm një udhëtim drejt një vendi, po organizohet një bashkim njerëzish nga e gjithë Kosova në një zë të përbashkët dhe të vetëm: Liri për çlirimtarët!”, ka deklaruar Hoxha.
Në konferencë është bërë e ditur edhe një aktivitet tjetër në kuadër të këtij organizimi. Hoxha ka njoftuar se të martën në mbrëmje, në orën 19:00, në Galerinë e Arteve të Prishtinës, në Pallatin e Rinisë, do të hapet ekspozita “Ditari i një fotografi të luftës”, e fotografit Visar Kryeziu.
“Dhe sot, si pjesë e këtij rrugëtimi për t’u kthyer prapa në kujtesë, i shtohet edhe një dëshmi e fuqishme përmes fotografive. Në orën 19:00, në Pallatin e Rinisë, në Galerinë e Arteve të Prishtinës, bashkë Galeria dhe platforma ‘Liria ka Emër’ shpalosin ekspozitën ‘Ditari i një fotografi të luftës’ të fotografit Visar Kryeziu. Përmes këtyre fotografive do të rikthehemi tek pamjet dhe dëshmitë e një kohe që nuk guxojmë ta harrojmë, tek sakrifica, qëndresa dhe çmimi i lartë i lirisë sonë”, ka thënë Hoxha.
