Kryetari i partisë Nisma për Kosovën, Fatmir Limaj, ka thanë se nuk mund të thirremi në shoqni demokratike nëse fillojmë me selektue vendimet si kjo e Gjykatës Speciale.
Parlamenti e ka mbyllë ketë çashtje dhe respektimi i këtij vendimi asht obligim për të gjithë pamvarësisht a kanë qenë kundër apo pro dhe me kerkue që të kthehen prapë për votim në parlament
Lexoni qendrimin e plotë të Limajt:
“Respektimi i vullnetit të shumicës dhe nënshtrimi ndaj vendimeve të institucioneve kushtetuese
Obligim për ne të gjithë është t’i ruajmë, t’i respektojmë dhe t’u nënshtrohemi institucioneve demokratike e kushtetuese të vendit tonë.
Ka pasur shumë debate pro e kundër ndryshimeve kushtetuese, me argumente e pa argumente, varet kush si i ka vlerësuar, por një lloj debati publik e demokratik është zhvilluar, ani se një pjesë e mirë e medieve veçanërisht atyre qeveritare hapur kanë qenë sikurse gjithmonë në vijë me politikën zyrtare të koalicionit qeveritar.
Ky debat ka kulmuar në Kuvendin e Kosovës pas procedimit të amendamenteve për ndryshime kushtetuese nga ana e qeverisë dhe pas një debati nga deputetët e parlamentit, parlamenti përmes procedurave demokratike, me një votim të hapur votoj dhe vendosi kundër ndryshimeve kushtetuese të propozuara nga qeveria.
Ky vendimi i parlamentit e ka mbyllur këtë çështje, dhe respektimi i këtij vendimi është obligim për të gjithë pavarësisht a kanë qenë pro apo kundër. Kjo është demokracia, respektimi i vullnetit të shumicës dhe nënshtrimi ndaj vendimeve të institucioneve kushtetuese.
Nuk mund të thirremi në shoqëri demokratike dhe në rend demokratik në të njëjtën kohë, nëse ne fillojmë të selektojmë vendimet, në ato që na pëlqejnë t’i respektojmë, ndërsa ato që nuk na pëlqejnë t’i refuzojmë së zbatuari, të mos i respektojmë e injorojmë ose të kërkojmë që të kthehen prapë për votim në parlament deri sa të vendoset sipas dëshirës tonë.
Nëse vazhdojmë kështu atëherë i hapet rrugë edhe palës tjetër që të veprojë njëjtë dhe kështu kontestimi i institucioneve dhe vendimeve të tyre do të shkojë në pafundësi. Kështu ne do të qojmë mesazh qytetarëve vendit tonë nënshtrojuni dhe respektoni vetëm ligjet dhe vendimet që ju pëlqejnë, ato që nuk ju pëlqejnë nuk keni nevojë ti pranoni dhe respektoni.
Jo kjo logjikë e kontestimit dhe mos pranimit të vendimeve është një rrugë e rrezikshme që shpie në rrënimin e institucioneve demokratike, autoritetin e tyre kushtetues dhe integritetin e tyre.
Prandaj, i bëj thirrje qeverisë të deklarohet hapur se do ta respekton vendimin e parlamentit dhe të heq dorë nga çdo tentativë për rikthim të kësaj çështje tashmë të vendosur, për ndryshe çdo përpjekje për të injoruar këtë vendim të parlamentit, qeveria me vetëdije po rrënon sistemin demokratik të këtij vendi dhe po e fut vendin përfundimisht në anarki.
Gjithashtu i ftoj të gjithë ata që kanë punuar dhe dëshirojnë të punojnë për një Kosovë demokratike, pavarësisht qëndrimit të tyre që e kanë pasur për ndryshimet kushtetuese para vendimit të kuvendit, i ftoj që jo vetëm të respektojnë këtë vendim, por të kundërshtojnë çfarëdo tentative për të cenuar apo rrënuar funksionimin demokratik të institucioneve të Kosovës”.
