Ish-komandanti i UÇK-së për Zonën Operative të Karadakut (ZOK) dhe kandidati për deputet nga radhët e AAK-së, Ahmet Isufi, ka shkruar në një postim se mbrojtja e vlerave të luftës së UÇK-së nuk ka të bëjë vetëm me kujtesën dhe nderimin e të rënëve, por para së gjithash është përgjegjësi shtetërore.
Sipas Isufit, Ligji për Mbrojtjen e Vlerave të Luftës së UÇK-së është një domosdoshmëri, pasi një shtet që nuk i mbron vlerat mbi të cilat është ndërtuar rrezikon të humbasë themelin e tij moral dhe kombëtar.
Ai ka kujtuar se Aleanca është angazhuar vazhdimisht për kategoritë e dala nga lufta dhe gjatë qeverisjes së saj ka themeluar Departamentin e Vlerave të Luftës për të përfaqësuar me dinjitet familjet e dëshmorëve, invalidët dhe veteranët e luftës.
Isufi ka theksuar se përkujdesja për këto kategori duhet të jetë e vazhdueshme dhe institucionale, duke shtuar se është obligim i të gjallëve që Kosovën ta bëjnë ashtu siç e ëndërruan ata që ranë për lirinë e saj – një shtet të drejtë, të fortë, dinjitoz dhe krenar për historinë e vet.
“Kosova bëhet me njerëz që historia iu ka dhënë epitetin çlirimtar. Nuk bëhet me ata që interesat personale i nxjerrin para secilit interes tjetër”, ka shkruar Isufi.
