Fatos Rizvanolli, i arrestuar ditë më parë nga Policia, kishte lidhje të ngushta me xhihadistët dhe “liderët” shqiptarë të grupeve terroriste në Siri dhe Irak, ai ishte në shërbim me financa për rekrutuesit e të rinjve në ISIS.
Gazeta “Zëri” mëson për rrjetin e të dyshuarve kosovarë që financonin “Shtetin Islamik”.
I deklaruar si banues me qira në një banesë në Prishtinë dhe ndërkohë po zhvillonte biznese jo të vogla në pjesë të ndryshme të kryeqytetit.
Para disa viteve ishte shitës i hamburgerëve “hallall” prapa Teatrit Kombëtar e tash një kohë të gjatë është pronar i disa autolarjeve dhe biznesit për dhënien e veturave me qira nëpër Prishtinë.
Por, njëkohësisht, mik i ngushtë i udhëheqësve të grupeve radikale fetare në Kosovë dhe rekrutuesve për në “Shtetin Islamik” (ISIS).
Fatos Rizvanolli, i arrestuar të mërkurën nga Policia e Kosovës, i dyshuar për financimin e rrjetit të “Shtetit Islamik” nga Kosova dhe lidhjet e tij të ngushta me xhihadistët dhe rekrutuesit kryesorë në Kosovë, mësohet të ketë qenë që nga fillimi shumë i afërt me “liderët” shqiptarë të grupeve terroriste në Siri dhe Irak.
Gazeta “Zëri” mëson detajet e aktiviteteve dhe të lidhjeve të Rizvanollit me grupet terroriste, i cili për vite me radhë kishte kamufluar aktivitetin e tij me bizneset e veturave. “Njëri nga 10 terroristët më të kërkuar në botë, Lavdrim Muhaxheri, sa ka qenë në Kosovë ka shfrytëzuar veturat e Rizvanollit dhe është mik i mirë i tij”, bën të ditur burimi i gazetës “Zëri”.
