Lidhja Demokratike e Kosovës, nuk pritet të marrë ndonjë veprim konkret me qëllim të kapërcimit të krizës politike. Kjo parti, e cila udhëheq me Qeverinë për herë të parë pas luftës në Kosovë, është e kënaqur me faktin qe Qeveria po funksionon në mënyrë normale, ndërsa nuk kanë ide se si të funksionalizojnë Kuvendin.
Haki Rugova, nënkryetar i këtij subjekti thotë se kjo parti nuk ka në plan të ndërmarr ndonjë hap konkret për tejkalimin e krizës dhe se zgjidhja duhet të bëhet në kuadër të institucioneve.
“Nuk kam ide me të thënë se cili është hapi i ardhshëm qe do të ndermirët. Ajo që mund të them është se ne qëndrojmë në pozicionet institucionale dhe vazhdojmë të qëndrojmë në këto pozicione. Pra, do të vazhdohet në këtë forme. Koalicioni qeveritar nuk do të zgjerohet dhe nuk ka asnjë opsion tjetër”, ka thënë Rugova.
LDK, sipas tij, do të ketë rol vendimtar edhe në të ardhmen duke shtuar se PDK nuk mund të ndërmarr asnjë hap pa pasur një qëndrim të përbashkët më LDK-në.
E, drejtori i Lëvizjes Fol, Petrit Zogaj, thotë se LDK është brenda filozofisë se saj. Ajo sipas tij, qëndron anash dhe nuk përfshihet në tejkalimin e krizave. Përgjegjësinë për qeverisjen e vendit, sipas tij, e mban LDK dhe Isa Mustafa.
