Lidhja Demokratike e Kosovës – Dega në Podujevë, me një manifestim solemn, ka shënuar sot 26-vjetorin e themelimit.
“Në manifestimin madhështor të organizuar sot, me rastin e shënimit të 26-vjetorit të themelimit të Lidhjes Demokratike të Kosovës në Podujevë, përveç Kryetarit të Degës së LDK-së në Podujevë, Agim Veliu dhe strukturave udhëheqëse të degës, ishin të pranishëm edhe nënkryetari i LDK-së në nivel qendror, Haki Rugova, Sekretari i Përgithshëm i LDK-së, Ismet Beqiri, deputetë, ministra e zëvendësministra nga radhët e LDK-së si dhe anëtarë e simpatizantë të shumtë”, thuhet në komunikatën dërguar mediave.
Kryetari i Degës së LDK-së, njëherësh edhe Nënkryetar i partisë në nivel qendror, Agim Veliu, duke folur në manifestimin e sotëm, tha se “Presidenti Rugova, Lidhja Demokratike e Kosovës janë vlera demokratike e kombëtare, ato janë dhe mbeten përherë në saje të besimit, investimit dhe përkushtimit tonë të lirë për qytetari, demokraci perëndimore dhe progres social”.
“Sikundër çdo 19 mars, në këto 26 vjet, jemi mbledhur kështu, së bashku e solemnisht, të gjithë në festë e në kujtim të Ditës së themelimit të Degës sonë, të rrugës që bëmë, të arritjeve e bilanceve tona të përbashkëta si dhe, konsolidimit e avansimit tonë të vazhdueshëm e të vendosur si politikë, si demokraci dhe si institucione.Në cilësinë time drejtuese politike e institucionale dua t’ju përshëndes dhe t’ju falenderoj të gjithë juve që madhështoni këtë mbledhim dhe në emrin tuaj t’ju dëshiroj mirëseardhje”, tha kryetari Veliu.
“Një vjet po mbushen sot, qëkurë në këtë vend e solemnisht shënuam çerkshekullin e jetës e të aktivitetit politik, shtetëror e kombëtar të Lidhjes Demokratike në radhë të parë, por edhe të kontributit të Degës së Podujevës. Një vjet pas, LDK, në krye të punëve e të angazhimeve politike e institucionale, më e maturuar e më e përkushtuar në përmbushjen e synimeve dhe objektivave të saja politike e të qeverisjes, në nivelin shtetëror dhe lokal”.
“Lidhja Demokratike vazhdon të qeveris në koalicion e me program që, substancë ka zhvillimin ekonomik dhe punësimin, demokracinë dhe integrimin euro-atlantik, përparimin e arsimit, dijes dhe teknologjisë; politikave të reja në shëndetësi dhe mirëqenie sociale, çështjeve të gruas dhe të të rinjëve, kujdesit të shtuar ndaj mjedisit, të drejtave të komuniteteve dhe fqinjësisë së mirë.Rezultatet janë në të gjitha fushat, ka avancim në dinamikë, ritme reale e të matshme,. Nevojat janë të mëdha, vështirësitë të shumta, siç edhe vullneti dhe vendosmëria për jetësimin e objektivave të zhvillimit”, tha kryetari Veliu.
“Ju siguroj se, LDK, organet e saj drejtuese, Kryetari dhe njëherit Kryeministri i Kosovës, në veprimtarinë politike e institucionale sot, njësoj sikundër edhe në Marrëveshjen për Qeverisj e në koalicion, priren parasëgjithash nga interesi i vendit, i zhvillimit dhe integrimit dhe i miqësisë së përherëshme me SHBA dhe BE.Çdo vendim është diskutuar dhe miratuar në Kryesinë dhe në Këshillin e Përgjithshëm, me përgjegjësinë dhe kujdesin maksimal politik për Lidhjen Demokratike, zhvillimin dhe fuqizimin demokratik në gjithë strukturën dhe shtrirjen e saj”, tha kryetari veliu.
“Së këndejmi, Kryeministri, ministrat dhe deputetë e LDK kanë mbështetjen tonë në angazhimet shtetërore, në ushtrim të kompetencave kushtetuese e ligjore.
Sikundër dihet tashmë, në gjithë ekzistencën tash e 26 vjet të Lidhjes Demokratike të Kosovës, diskutimi, mendimi ndryshe e i lirë dhe demokracia e brendshme, janë zhvilluar, janë kultivuar lirshëm e pa pengesë deri në vendimmarrje”.
“Janë mbajtur zgjedhje të brendshme e me proces demokratik votimi, ku janë legjitimuar e kanë qarkulluar elita udhëheqëse politike e lid er partie.LDK është e para dhe sa, për 26 vjet parti nacionale, demokratike e antikomuniste, po ashtu edhe për modelin dhe kulturën demokratike si shenjë identitare. Ka pasur e do të ketë pakënaqësi e të pa kënaqur, për motive, arsye a ambicie të ndryshme. Kjo nuk është as vetëm në LDK e sot, e as vetëm në pluralizmin politik tek ne. Por, një fakt dihet mirë, se në LDK askujt nuk i është mohuar kontributi, atë çka kemi investuar për LDK-në rri aty dhe kush kthen atë e gjen”.
Më tej kryetari Veliu ka theksuar se se “ka sot individë që të shtyrë inatesh, qejfmbetjesh a ambiciesh të qenit i pari, nuk prajnë së shfryri ndaj organeve të LDK, ndaj lidershipit kudo që u jepet mundësia e rasti. Bashkohen me kakofoninë e atyre që si dje edhe sot u pengon LDK, qeverisja për së mbari që po ndodhë tani dhe frika nga sukseset në vazhdim”.
“Ne duam që të gjithë ata t’i kthehen kontributit të tyre brenda strukturave dhe organizimit tonë e në pajtim me Programin dhe Statutin. T’i diskutojmë e t’i gjejmë mënyrat e duhura për fuqizimin dhe demokratizimin model.Sa për disa, që moti kanë humbur udhën, pse s’ua themi shpesh nuk është se si dimë”, ka shtuar ai.
Kryetari Veliu tha se “po e mbyll fjalën me bindjen e palëkundur dhe përkushtimin për shtetin, vlerat e lirisë dhe demokracisë këtu, në Republikën e Kosovës”.
Në këtë manifestim një fjalë rasti e mbajti edhe nënkryetari i LDK-së, Haki Rugova, i cili tha se Dega e LDK-së në Podujevë vazhdon të jetë një nga degët më të organizuara e këtë e dëshmon edhe besimi i palëkundur në LDK, i qytetarëve dhe elektoratit llapjan.
Në manifestmin e sotëm për nder të 26-vjetorit të themelimit të Degës së LDK-së në Podujevë, Kori i Qytetit ka interpretuar këngë korale.
