ormuar për procesin e punës së Komisionit Shtetërorë të Republikës së Kosovës për Demarkacionin e kufirit me Malin e Zi, që përfshinë territorin e Komunës së Pejës.
Punën tre vjeçare të komisionit për demarkacionin e kufirit të Kosovës me Malin e Zi, të nisur katër vite më parë, para asamblistëve pejanë e ka prezantuar kryetari i këtij komisioni Murat Meha.
Ai ka sqaruar se në procesin e deritashëm dhe në takimet me komisionin malazez janë përdorur dokumente kadastrale, harta dhe atllase të ndryshme, që sipas tij shfrytëzohen edhe sot nga institucionet komunale dhe ato qendrore.
Në mesin e hartave ishte edhe një e vitit 1988 e ish Krahinës Autonome të Kosovës, e cila si duket është marrë kryesisht për bazë duke iu referuar dokumentit në Pakon e Ahtisarit për përcaktimin e vijave kufitare me shtetet fqinjë.
Ne grumbullin e hartave që Meha prezantoi, nuk figuronte askund harta origjinale e vitit 1974, mbi të cilën fillimisht janë marr vesh të dy shtetet që të përcaktohet vija kufitare.
Kritiku më i madh i punës së deritashme të komisionit kosovar, Ali Lajçi, ndonëse është edhe vet pjesë e këtij komisioni si këshilltarë dhe monitorues nga Komuna e Pejës, ai e përballi komisionin me hartën origjinale që e shpalosi jo vetëm para anëtarëve të komisionit dhe asamblistëve, por edhe para dhjetëra rugovasve që kishin mbushur sallën e Kuvendit.
Lajçi tha se të gjitha këto dokumente dhe harta që i prezantoi komisioni janë të punuara nga regjimi i shtetit ish Jugosllav dhe Serbisë, dhe se asnjëra nuk është harta e vitit 1974.
“Kjo është harta origjinale e vitit 1974”, u shpreh Lajçi derisa hapte një hartë të madhe të palosur mes kopertinave të trasha, mbi të cilat shkruante viti 1974 dhe Krahina Socialiste Autonome e Kosovës.
Lajçi u tha asamblistëve se komisioni kosovar për demarkacionin e kufijve asnjëherë nuk ka prezantuar një hartë të vetën në takimet me komisionin malazez, por gjithnjë, siç tha Lajçi, kanë diskutuar vetëm rreth propozimeve që i bënin malazezët me harta e tyre të falsifikuara në vitin 2001.
“Nëse përcaktohet kufiri përfundimisht me ato harta atëherë në humbim afër shtatë mijë hektarë pyje e kullosa më të bukura në atë pjesë më Malin e Zi, i cili veç tash ka bërë plane për ndërtimin e qendrave sportive dhe turistike në tokat që pretendojnë me na i marrë. Madje vendet që duan t’i marrin e që komisioni jonë nuk i kundërshton, janë edhe pika strategjike, ngase prej atyre bjeshkëve pastaj e shohin tërë Kosovën si në pëllëmbë të dorës”, atakon Lajçi anëtarët e pranishëm të komisionit të Kosovës.
Madje sipas Lajçit, nëse ratifikohet ky dokument për demarkacionin e kufirit ekziston rreziku të ketë edhe shpërngulje të popullatës për shkak të humbjes së pronave të veta përgjatë kufirit me Malin e Zi.
“Kjo është politikë jokombëtarë e vagabondëve në qeveri”, qiste Lajqi vrer jashtë, derisa kërkonte nga asamblistët e Pejës që të mbrojnë pronat e njerëzve dhe të kundërshtojnë përcaktimin e vijës kufitare që vendosë ky komision.
Mbështetje i dhanë Lajçit të gjitha grupet politike të përfaqësuara në Kuvendin Komunal të Pejës, të cilët kërkuan gjithashtu transparencë nga komisioni për punën e tij, i cili në këtë takim me kuvendarët e Pejës nuk u tregua aspak bindës me faktet që i prezantoi.
“Komisioni nuk na ofroi asgjë çka kemi kërkuar”, tha kryesuesi i Kuvendit Komunal të Pejës, Islam Husaj.
Seanca e cila zgjati plotë tri orë, u ndërpre për gjysmë ore që Kuvendi të nxjerrë një draft-konkluzion për demarkacionin kufirit të Kosovës me Malin e Zi.
Kur u lexua dhe u miratuar konkluzion unanimisht nga asamblistët, në sallë nuk ishin më të pranishëm anëtarët e komisionit kosovar për demarkacionin e kufirit, të cilët kishin ikur gjatë pauzës.
Me njërën prej gjashtë pikave të konkluzionit, Kuvendi Komunal i Pejës ua bënë të qartë institucioneve qendrore se për Komunën e Pejës do të jetë i papranueshëm çdo vendim për vijën kufitare më Malin e Zi që shkon në dëm të qytetarëve.
Institucionet dhe qytetarët e Pejës shpresojnë që Kuvendi i Kosovës nuk do ta ratifikojë dokumentin për demarkacionin e kufirit me Malin e Zi dhe që procesi të futet në arbitrazh dhe më këtë proces pastaj do të merret një komision ndërkombëtar që do të “referojë” në bazë të argumenteve që do të prezantohen nga të dyja palët./elajm/
