Shefi i Grupit Parlamentar të Partisë Demokratike të Kosovës, Adem Grabovci në një intervistë të dhënë për Gazetën Blic, e cila do të botohet në orët e pasdites flet për funksionimin e koalicionit me LDK-në, për kërkesën e opozitës për zgjedhje të reja, për Gjykatën Speciale, për listën e emrave që mund të akuzohen nga kjo gjykatë…
Në këtë intervistë, Grabovci flet për herë të parë edhe për atë se kush është më i fortë në PDK. Edhe pse në opinion përflitet për një luftë të madhe ndërmjet dyshes së PDK-së, Hashim Thaçi e Kadri Veseli se kush ta marrë primatin e partisë, Adem Grabovci thotë se nuk ka kurrfarë rivaliteti. Sipas tij, Hashim Thaçi është 1 i PDK-së, derisa sipas tij, 2 është Kadri Veseli.
I pyetur se më kënd është ai, me 1 apo me 2 e partisë, ai ka thënë një përgjigje diplomatike, duke thënë se vota është ajo që secilit ia përcakton pozicionin.
Kjo është përgjigja e tij për atë se kush është më i fortë në PDK:
“Partia Demokratike e Kosovës, tashmë është dëshmuar si parti që kultivon vlerat demokratike, duke krijuar hapësirë veprimi e debati në strukturat e saj. Si parti, kemi kaluar edhe në procese të brendshme zgjedhore, ku janë zgjedhë në mënyrë demokratike organet e saja drejtuese. Zgjedhjet kanë qenë të hapura dhe mundësia e kandidimit ka qenë e hapur. Më vota unanime, në krye të partisë vazhdon të jetë kryetari i partisë, z.Hashim Thaçi, e zëvendëskryetar Kadri Veseli. Ndërsa unë jam njëri nga nënkryetarët e partisë. Në bazë të përgjegjësive të marra nga vota në parti, punës dhe angazhimit, kuptohet se është e përcaktuar edhe pozita. Të gjithë kryejmë punën tonë, për të cilën jemi të thirrur, me përgjegjësi të lartë. Edhe koordinimi dhe bashkëpunimi është në nivel të shkëlqyeshëm. Ne jemi njohur dhe kemi bashkëvepruar edhe në kohëra shumë të vështira, pa u ndalur, dhe duke qenë shumë koherent në mes vete. Dhe, tani vazhdojmë poashtu, në të mirë të fuqizimit të institucioneve dhe shtetit të Kosovës. Pra, këtu nuk bëhet fjalë për asfarë rivaliteti”.
/ Gazeta Blic
