Kryeministri në detyrë i Kosovës, Albin Kurti, së bashku me zëvendëskryeministren dhe ministren në detyrë të Drejtësisë, Donika Gërvalla-Schwarz, ka vizituar Institutin për Mjekësi Ligjore (IML), ku janë bartur mbetjet mortore që dyshohet se u përkasin së paku 23 personave të zhdukur me dhunë gjatë luftës së fundit në Kosovë.
Kurti ka bërë të ditur se mbetjet janë gjetur në tri lokacione në fshatrat Kalludër dhe Jabukë, në komunën e Zubin Potokut.
“Bashkë me zëvendëskryeministren dhe ministren e Drejtësisë, Donika Gërvalla-Schwarz, vizituam Institutin për Mjekësi Ligjore, ku janë bartur mbetjet mortore që dyshohet se u përkasin së paku 23 personave të zhdukur me dhunë gjatë luftës së fundit, të gjetura në tri lokacione në fshatrat Kalludër dhe Jabukë, në komunën e Zubin Potokut”, ka shkruar Kurti.
Sipas tij, sot është bërë një muaj nga fillimi i gërmimeve, ndërsa procesi tashmë ka kaluar në fazën e ekzaminimeve dhe procedurave për identifikimin e mbetjeve.
“Teksa sot u bën një muaj nga data e fillimit të gërmimeve, procesi veçse është në një fazë tjetër. Në IML po kryhen ekzaminimet dhe procedurat e mëtejme profesionale për identifikim dhe dokumentim. Deri më tani, katër mostra të ADN-së, të cilat i përkasin mbetjeve mortore të gjetura në Jabukë, janë dërguar për analizë në Hagë”, ka deklaruar kryeministri në detyrë.
Kurti ka dhënë edhe të dhëna për gërmimet e kryera që nga përfundimi i luftës, duke theksuar se vetëm gjatë këtij viti janë gjetur 30 mbetje mortore.
“Që nga përfundimi i luftës janë kryer rreth 2700 gërmime, e vetëm këtë vit nga 17 sosh janë gjetur gjithsej 30 mbetje mortore. Zbardhja e fatit të të zhdukurve me dhunë, përveçse i jep fund pritjes së familjeve, me ankth e vuajtje, i hapë rrugë kërkimit të drejtësisë”, ka shkruar Kurti.
Ai ka folur edhe për investimet në modernizimin e Institutit për Mjekësi Ligjore, duke bërë të ditur se së fundmi janë investuar mbi 814 mijë euro.
“Së fundi, investimi i mbi 814 mijë euro, ka mundësuar modernizimin e infrastrukturës së IML-së, rritjen e sigurisë dhe funksionalitetit të objektit dhe krijimin e kushteve më të mira per ofrimin e shërbimeve mjeko ligjore”, ka thënë Kurti.
Sipas tij, me këto investime janë rehabilituar dhe modernizuar disa prej hapësirave kryesore të IML-së.
“Janë rehabilituar dhe modernizuar salla e Autopsisë, Laboratorët e Toksikologjisë, Histopatologjisë dhe Antropologjisë, është krijuar një arkiv modern dhe hapësirë e përshtatshme për ruajtjen e dëshmive si dhe janë bërë investime në hapësirat për ekzaminime klinike mjeko ligjore”, ka shtuar Kurti.
