Kryeministri në detyrë i Kosovës, Albin Kurti, mori pjesë në prezantimin e ecurisë së hartimit të Master Planit për Kompleksin Memorial “Adem Jashari” në Prekaz, ku theksoi rëndësinë e këtij projekti për ruajtjen e kujtesës historike, trashëgimisë kulturore dhe identitetit shtetëror.
Sipas një njoftimi të Qeverisë së Kosovës, Kurti e cilësoi projektin si një nga më të rëndësishmit për vendin, duke nënvizuar simbolikën që bart Prekazi në historinë e Kosovës.
“Prekazi zë një vend të posaçëm në kujtesën historike të popullit tonë. Qëndresa dhe sakrifica e familjes Jashari e shndërruan atë në simbol të mbrojtjes së atdheut dhe të përkushtimit ndaj lirisë, duke dëshmuar kësisoj se liria nuk është vetëm ideal politik, por edhe vlerë për të cilën flijohet gjithçka”, tha Kurti.
Ai theksoi se trajtimi i Kompleksit Memorial “Adem Jashari” tejkalon dimensionin e planifikimit hapësinor dhe të konservimit.
“Për këtë arsye, trajtimi i Kompleksit Memorial ‘Adem Jashari’ nuk është vetëm një projekt i planifikimit hapësinor, i konservimit apo i muzealizimit. Ai është një detyrim institucional për të ruajtur, dokumentuar dhe përcjellë me dinjitet këtë trashëgimi te brezat që vijnë pas nesh”, u shpreh Kurti.
Kryeministri në detyrë bëri të ditur se projekti po zhvillohet sipas planit të paraparë dhe se gjatë këtij viti pritet të përfundojnë projektet e konservimit të Kullave të Rezistencës.
“Sipas planifikimit të paraparë, gjatë këtij viti pritet të përfundojnë projektet e konservimit të Kullave të Rezistencës. Kjo do t’i mundësojë Ministrisë së Kulturës dhe Turizmit që të iniciojë procedurat e prokurimit për zbatimin e këtyre projekteve, duke shënuar kalimin nga faza e planifikimit dhe projektimit në fazën e ndërhyrjeve konkrete konservuese në terren”, deklaroi ai.
Kurti shtoi se institucionet e Kosovës mbeten të përkushtuara për të siguruar kushtet e nevojshme institucionale, profesionale dhe financiare për realizimin e projektit sipas standardeve më të larta.
