Kosova humb miliona euro investime, qeveria s’ishte në gjendje t’u ofronte pronën

E publikuar: 21/03/2015 19:59
Rreshtat+- AShkronjat+- Printo

Për disa ditë Kosova ka humbur mundësinë t’i përfitonte miliona euro investime. Vitin e kaluar në vendin tonë ka qëndruar një delegacion i madh nga Emiratet e Bashkuara Arabe.

Përpos diskutimeve për bashkëpunimin në nivel politik, ata kanë shprehur gatishmërinë për të investuar në projekte afër 500 milionë eurosh, raporton KTV.

Burime të KTV-së në këtë takim kanë thënë se delegacioni i Emirateve u ka thënë drejtuesve shtetërorë të vendit se janë të gatshëm të investojnë, por se duan që të kenë punë vetëm me qeverinë dhe ajo t’u japë garanci për pronat ku do të investojnë dhe t’i mbrojë ata.

Mirëpo këto kërkesa pala kosovare nuk ka qenë e gatshme t’i marrë përsipër, duke u sugjeruar atyre që të konkurrojnë në procesin e privatizimit dhe të kërkojnë mbrojtje nga gjykatat, gjë e cila nuk u ka pëlqyer të interesuarve për investime, gjë e cila ndikoi në largimin e tyre.

Agron Demi nga Instituti GAP thotë se dështimi disa herë i projekteve të mëdha energjetike dhe i atyre të telekomunikacionit ka bërë që interesimi për investime të bie dukshëm.

Nga ana tjetër, drejtues të Drejtorisë për promovim të sektorit privat në Agjencinë për Investime dhe Përkrahjen e Ndërmarrjeve në Kosovë thonë se po presin investime, duke u bazuar në përmbajtjen e planit ekonomik të hartuar nga Qeveria. Megjithatë, pranojnë se investitorëve më së shumti u intereson stabiliteti politik.