Kosova dhe Komisioni Evropian kanë mbajtur në Prishtinë takimin vjetor të Komitetit Monitorues të Instrumentit të Asistencës së Para-Anëtarësimit (IPA), ku u diskutua për zbatimin e mbështetjes financiare dhe teknike të Bashkimit Evropian, si dhe për avancimin e reformave që lidhen me procesin e integrimit evropian të Kosovës.
Takimi u bashkëkryesua nga Koordinatori Kombëtar për IPA-n, Florim Canolli, dhe Shefi i Njësisë për Serbinë dhe Kosovën në Drejtorinë e Përgjithshme të Komisionit Evropian për Zgjerim dhe Fqinjësinë Lindore, Jiri Plecity.
Sipas komunikatës, diskutimet u përqendruan në progresin e përgjithshëm të zbatimit të asistencës së BE-së në sektorë të ndryshëm, duke trajtuar si kriteret politike ashtu edhe ato ekonomike që lidhen me integrimin evropian.
“Takimi mes përfaqësuesve të Kosovës dhe të Komisionit Evropian u fokusua në zbatimin e mbështetjes financiare dhe teknike të BE-së për Kosovën në kuadër të IPA-s, si dhe në avancimin e reformave që mbështesin rrugën e integrimit të Kosovës në BE”, thuhet në komunikatë.
Në takim u diskutuan çështje kyçe, përfshirë sundimin e ligjit, reformën e administratës publike, reformat strukturore, zhvillimin e sektorit privat, kapitalin njerëzor dhe ndërtimin e një shoqërie gjithëpërfshirëse. Gjithashtu, u shqyrtuan investimet e Bashkimit Evropian të realizuara përmes Kornizës së Investimeve për Ballkanin Perëndimor (WBIF) dhe programeve të Bashkëpunimit Ndërkufitar (CBC).
Të dyja palët theksuan rëndësinë e monitorimit dhe zbatimit efektiv të asistencës së BE-së, ndërsa Komisioni Evropian vlerësoi angazhimin e institucioneve të Kosovës për rritjen e kapaciteteve absorbuese dhe koordinimin më të mirë të donatorëve.
“Komisioni Evropian mirëpriti përkushtimin e Qeverisë për forcimin e kapacitetit absorbues të Kosovës dhe përmirësimin e koordinimit të përgjithshëm të donatorëve”, thuhet në njoftim.
Komisioni Evropian vlerësoi progresin e arritur në zbatimin e asistencës IPA, por njëkohësisht kërkoi përshpejtimin e realizimit të projekteve të dakorduara dhe adresimin e sfidave që po pengojnë disa prej tyre.
“Komisioni Evropian theksoi rëndësinë e zbatimit në kohë të të gjitha projekteve të dakorduara për të siguruar që mbështetja e BE-së të sjellë përfitime të prekshme për qytetarët dhe bizneset. Gjithashtu, u theksua se disa projekte sfiduese kërkojnë veprime të menjëhershme nga autoritetet relevante për të siguruar zbatimin e tyre të suksesshëm dhe për t’i avancuar reformat esenciale për rrugën evropiane të Kosovës”, theksohet në komunikatë.
Nga ana tjetër, Kosova riafirmoi përkushtimin për monitorimin e afërt të projekteve dhe vazhdimin e reformave të mbështetura nga Bashkimi Evropian.
“Kosova riafirmoi zotimin për monitorim nga afër të zbatimit të projekteve të dakorduara dhe për vazhdimin e punës drejt realizimit efektiv të reformave të mbështetura nga Bashkimi Evropian”, thuhet në komunikatë.
Kosova dhe Komisioni Evropian u dakorduan të vazhdojnë bashkëpunimin për të rritur efektivitetin e asistencës IPA dhe për të mbështetur zbatimin e reformave të nevojshme për integrimin evropian të vendit.
Sipas komunikatës, me më shumë se 3.7 miliardë euro të investuara në Kosovë që nga viti 1999, Bashkimi Evropian mbetet partneri më i madh zhvillimor dhe donatori kryesor financiar i Kosovës.
