Presidentja e vendit, Atifete Jahjaga, ka paralajmëruar të enjten se shumë shpejt do ta fillojë punën komisioni i pavarur me ekspertët ndërkombëtarë, i cili do ta analizojë procesin e demarkacionit me Malin e Zi.
Përfaqësuesit e pozitës e kanë mirëpritur fillimin e punës së këtij komisioni të ri, por jo edhe përfaqësuesit e opozitës.
Ndërsa analistët politikë mendojnë se paralajmërimi i presidentes për këtë komision është vetëm një veprim sa për t’i ulur tensionet politike në vend.
Shefi i grupit parlamentar të PDK-së, Adem Grabovci, ka thënë për gazetën “Epoka e re” se paralajmërimi i presidentes Jahjaga për fillimin e punës së një komisioni të tillë është i mirëseardhur.
“Çdo përpjekje që çon drejt zgjidhjes së situatës me dialog, ashtu edhe siç duhet, është i mirëseardhur”, ka thënë Grabovci.
Ndërsa, lideri i AAK-së, Ramush Haradinaj, ka thënë se ide tashmë është e vonuar.
Kurse analisti Naim Maloku, mendon se paralajmërimi i presidentes për një hap të tillë është vetëm tentim për t’i ulur tensionet politike në Kosovë.
