Kolegji AAB ka organizuar një ceremoni komemorative në nderim të Prof. Dr. Mimoza Doko Perçukut, duke kujtuar kontributin e saj të çmuar në fushën akademike dhe edukimin e gjeneratave të reja.
Në ceremoni morën pjesë profesorë, studentë, bashkëpunëtorë dhe familjarë të së ndjerës, të cilët ndanë kujtime dhe vlerësime për jetën dhe veprën e saj. Themeluesi i Kolegjit AAB, Ilir Tafa, dhe rektori Blerim Olluri vlerësuan Prof. Doko si një akademike të përkushtuar dhe frymëzim për shumë breza studentësh.
Ceremonia u mbyll me mesazhe mirënjohjeje për kontributin e saj të jashtëzakonshëm, ndërsa Kolegji AAB theksoi se do ta kujtojë gjithmonë si një kolege të çmuar dhe një personalitet me vlera të larta morale.
Postimi i plotë:
Kolegji AAB organizon ceremoni komemorative në nderim të Profesoreshë Mimoza Doko Perçuku-t
Me ndjenja të thella pikëllimi dhe respekti, institucioni ynë ka organizuar një ceremoni komemorative në nderim të profesoreshë Mimoza Doko-s, personalitet i shquar akademik me kontribut të paharruar në kujtesën e kolegëve, studentëve dhe të gjithë atyre që patën privilegjin ta njihnin.
Ceremonia u hap me një minutë heshtjeje në nderim të prof. Mimoza Doko dhe mblodhi profesorë, studentë, bashkëpunëtorë dhe familjarë të saj, të cilët ndanë kujtimet, vlerësimet dhe homazhet për jetën dhe veprën e saj.
Themeluesi i Kolegjit AAB, profesor Ilir Tafa, kujtoi rrugëtimin profesional të Dokos dhe bashkëpunimin e gjatë me ta, ndërsa tregoi për vullnetin e pashterrshëm të saj që të edukonte gjeneratat e reja dhe gatishmërinë për të qenë afër tyre.
Rektori i Kolegjit AAB, Blerim Olluri, shprehu ngushëllimet më të sinqerta për familjen Doko, duke vlerësuar figurën e profesoreshës si një akademike të përkushtuar dhe model frymëzimi për breza të tërë studentësh.
Prorektorja Venera Llunji ndau kujtime me profesoreshën si një mike të ngushtë por edhe si kolege, ndërsa u shpreh se energjia, humori dhe gjallëria e saj do t’i ngelin si kujtim për tërë jetën. Ajo tha se ndikimi i saj pozitiv në jetën profesionale të shumë kolegëve dhe studentëve është i pazëvendësueshëm.
Një moment veçanërisht prekës i ceremonisë ishte fjala e motrës së Prof. Dr. Mimoza Doko, Linda Doko, e cila ndau kujtime të çmuara nga jeta e saj familjare dhe rrugëtimi i saj njerëzor e profesional.
Me emocion dhe mirënjohje, ajo foli për dashurinë e Mimozës ndaj familjes, përkushtimin ndaj profesionit dhe vlerat që e karakterizonin si njeri. Në emër të familjes, ajo falënderoi drejtuesit e institucionit, kolegët, studentët dhe të gjithë pjesëmarrësit për organizimin e kësaj ceremonie përkujtimore dhe për respektin e treguar ndaj kujtimit të së ndjerës.
Ceremonia komemorative u mbyll me një mesazh të përbashkët mirënjohjeje për kontributin e jashtëzakonshëm të profesoreshë Mimoza Doko-s.
Kolegji AAB do ta kujtojë gjithmonë prof. Mimoza Doko-n si një kolege të çmuar dhe një njeri me vlera të larta morale.
U prehtë në paqe!
