Sami Khedira nuk do ta rinovojë kontratën me Realin Madridit duke përgatitur lamtumirën nga skuadra “Los Blancos”. Këtë e konfirmon vetë mesfushori gjerman që kërkon të provojë një eksperiencë të re pasi gjatë sezonit të fundit ka gjetur pak hapësira në radhët e skuadrës së Ancelottit.
“Stërvitja e fundit ishte disi e çuditshme, një ditë e shoqëruar me shumë emocione. Jam i trishtuar për këtë por duhet të largohem. Ky ishte viti më i vështirë i karrierës time por dëmtimi i rëndë në gju nuk më ka lejuar të luaj në vazhdimësi. Arrita të isha i pranishëm në finalen e Champions League dhe në Botërorin e Brazilit prandaj besoj se jam sforcuar shumë duke kërkuar rikuperimin në kohë rekord. Situata u komplikua shumë në fillim të sezonit. Gjithsesi, për të qenë deri në fund të ndershëm, duhet ta pranojmë se mosaktivizimi im nuk lidhet me dëmtimet”.
Në vijim, Khedira sqaron arsyet pse vendosi të mos hidhte firmën në kontratën e re.
“U takuam disa herë dhe unë personalisht kam qenë i sinqertë. Në dhjetor e kuptova se gjeja më e mirë që duhej të bëja ishte një aventurë e re. Më duhet të theksoj se ky vendim nuk lidhet aspak me klubin sepse oferta që më kanë bërë ishte shumë e mirë. Nuk është e vërtetë se kam kontaktuar me Bayernin sepse jemi në fundin e muajit Maj dhe unë nuk kam ende një skuadër të re. Kur Xabi Alonso u largua ua bëra me dije drejtuesve se nuk kisha asnjë qëllim ta ndiqja te Bayerni”.
Në fund, ai u jep një përgjigje edhe zërave që e kanë akuzuar për mungesë profesionalizmi.
“Ato që janë thënë gjatë sezonit të fundit më kanë vrarë në shpirt. Ky nuk ishte fundi që kisha dashur dhe më vjen shumë keq që më kanë akuzuar sepse në plan të parë kam vendosur përherë interesin e skuadrës”./supersport.al/
