Përfaqësuesja e Lartë e Bashkimit Evropian për Punët e Jashtme dhe Politikën e Sigurisë, njëherësh Zëvendëspresidente e Komisionit Evropian, Kaja Kallas, ka njoftuar se BE-ja po përgatit paketën e 21-të të sanksioneve kundër Rusisë, me synimin për të goditur më tej ekonominë që financon luftën në Ukrainë.
Në një seri postimesh në rrjetin social X, Kallas tha se Bashkimi Evropian po vazhdon të forcojë presionin ndaj Moskës.
“Tullë pas tulle po çmontojmë themelet e ekonomisë së luftës së Rusisë. Sot po paraqesim propozimet për paketën e 21-të të sanksioneve kundër Rusisë”, deklaroi ajo.
Sipas Kallas, paketa e re përfshin ngrirjen e përkohshme të kufirit maksimal të çmimit të naftës ruse, si dhe vendosjen në listën e sanksioneve të institucioneve që Rusia i përdor për të siguruar të ardhura dhe për të anashkaluar masat kufizuese të BE-së.
Ajo bëri të ditur se sanksionet do të synojnë bankat, prodhuesit e armëve, tregtarët e naftës, rafineritë dhe operatorët e kriptovalutave në vendet e treta që ndihmojnë Rusinë në financimin e luftës kundër Ukrainës.
Kallas theksoi se në kuadër të kësaj pakete është propozuar grupi më i madh i emërimeve në listën e sanksioneve në më shumë se dy vjet, me mbi 170 propozime të reja, veçanërisht në sektorin financiar.
“Po i heqim Rusisë mjetet për të financuar luftën”, u shpreh ajo.
Sipas planit të prezantuar, BE-ja synon të godasë rëndë sistemin financiar rus përmes ngrirjes së aseteve të afro 90 bankave, si dhe me ndalime shtesë të transaksioneve për më shumë se 30 banka në Rusi dhe vende të tjera.
Kallas theksoi gjithashtu se të ardhurat nga energjia vazhdojnë të ushqejnë makinerinë ushtarake ruse. Për këtë arsye, BE-ja planifikon masa të reja që përfshijnë kufizime shtesë për tregtinë e naftës ruse dhe ndalime të reja lidhur me rishitjen e cisternave të gazit natyror të lëngshëm (LNG) në Rusi.
Një pjesë e rëndësishme e paketës së re lidhet edhe me kompanitë që mbështesin kompleksin ushtarako-industrial rus. Sipas Kallas, më shumë se 30 subjekte të lidhura me prodhimin e dronëve do të përfshihen në listën e sanksioneve, ndërsa masa të reja të kontrollit të eksporteve do të zbatohen ndaj 50 kompanive, përfshirë kompani me seli në Kinë dhe Turqi.
Në fund, shefja e diplomacisë evropiane paralajmëroi edhe masa të reja ndaj personave të lidhur me forcat e armatosura ruse.
“Dyert e Evropës nuk duhet të jenë të hapura për ish-luftëtarët dhe luftëtarët aktualë rusë. Do të propozojmë një ndalim të plotë të lëshimit të vizave për ish-pjesëtarët dhe pjesëtarët aktualë të forcave të armatosura ruse, si dhe për grupet që veprojnë në emër të tyre”, deklaroi Kallas.
